Khliehriat, Nailur 08
Ka lympung ïalehkai 1st Division Foot-ball League ba la pynïaid da ka East Jaiñtia Hills District Football Associa-tion (EJHDFA) ka la sdang ha ka lah sngi U Blei ha madan artificial turf kaba ha Deinchynrum, Khliehriat.
Ha kane ka jingïakhun, ka Ladrymbai Dongwah SWSC ka la pynliem noh ïa ka Rangad SC da 3-1 kol. Ïa kine la thep da u Torres Sana (11), Dawanbor Lyngdoh (20), bad u Lekin Bareh (84), katba na ka Rangad SC la thep da u Sharki Dkhar (89).
Haba phai sha kawei pat ka jingïalehkai kaba la long kham hashwa hapdeng ka Byndihati CSC bad Rymbai Wahshnong SC ka la kut ha ka jingïakhaid mar 1-1 kol. Ïa ka kol ka Byndihati la thep da u Lungouhao Hangshing (24), bad na ka Rymbai Wahshnong SC la thep da u Verdictson Swer (85).
Ïa kane ka lympung la wan ban plie da u Bah Niyoo Sympli uba dei u adviser jong ka EJHDFA kum u kongsan ha ryngkat ka jingïadonlang ki nongïalam bad dkhot nongkitkam ka EJHDFA.
