Shillong, Nailur 08
Ka Mawlai SC ka la lah ban pynliem noh ïa ka Malki SC da 5-1 kol ha ka lympung ïalehkai Shillong Premier League 2025 ha ka lah sngi U Blei ha SSA Stadium kaba ha First Ground, Polo.
U Loving Suting u la thep ar kol, katba ïa kiwei pat la thep da u Robert Khongriah, Fairming Suting bad u Kevin Rymbai na ka bynra ban pynlong ïa kane ka kynhun hapoh ka jingïalam u Bah Hering Shangpliang ban jam sha ka kyrdan ba-ar bad kamai 9 point na ki saw sien ïakhun. Katba ka Malki SC kan ïai neh ha ka kyrdan kaba shatrai hadien ba ka danglah ban khur tang 3 point na ki saw sien ïakhun.
Haba wan ban bteng ïa ka kylla miet, ka kynhun ïalehkai ka Mawlai SC, ki la pyrshang ban pynsted beit ïa ka jingïakhun, kaba la plie lad ïa ki ban bteng ban thep ïa ki kol kiba sah jong ka jingïakhun.
Watla ka Mawlai SC ka tehlakam bha ïa ka jingïakhun, pynban na ka liang ki rangïalehkai jong ka Malki ruh, kim shym la pyndem tdong satia ïalade, hynrei katba don la jong ka buit ka bor, ki ïai pyrshang lem ban ïatynjuh bor ïa ka Mawlai SC, kaba ha kum kane ka sur ïalehkai, la mih paw ruh ki kabu ksiar ïa kane ka kynhun, ha kaba kawei na kine ka dei ha ka minit kaba 64, ha kaba ka Malki SC ka la ïoh ba kan shut ïa ka free-kick, ha kaba u Niklestone Ryntathiang, uba la thew bha da kumno ban shut ïa kane ka bol, hynrei kaba kut ka bol ka la her beit shabar jong ka diengkol.
Lashai ka sngi, ka jingïakhun kan long hapdeng ka lahduh ka samoi ba la dep ka Shillong Lajong FC pyrshah ïa ka Mylliem SC, ka ban dei artad ka jingïakhun kaba khatduh jong ka kylla kaba saw (Rd-4), ka ban long ha ka por 4:30 nohphai sngi.
