Shillong, Nailur 09
U Symbud Myntri Rangbah u ba khmih ïa ka tnad kam Pohïing (Police) u Bah Prestone Tynsong, u la bthah ïa ka Tnad Pulit ban leh da kaba tyngeh pyrshah ïa kino kino ki briew, kiba pyndonkam bakla ïa ki bor jong ka Sorkar khlem da ïoh ïa ka jingbit.
Haba kren sha ki lad pathai khubor ha ka 09 tarik u Nailur 2025 u Bah Prestone Tynsong u ong “Ngi la ai ka jingbthah ïa ka Police Headquarter bad kumjuh ruh ïa ki Superitendent of Police (SP) ba kin wad ïa baroh ki briew, kiba pyndonkam beaiñ, la ka dei ka jingtah ïit-ïong lane pyndait siren lane kano kano ka bym ïaid kat kum ki kyndon ba la buh da ka Sorkar”.
Kane ka jingkren jong u ka la mih hadien ka jingïohkem dang shen ïa ki briew kiba kam ïalade kum ki briew ka aiñ bad ïoh kurup ïa ki suloi ‘Air Gun’ na ki.
Halor ka jingkam ba uwei na kine kiba shah kem u lah ban ïakhun ïa ka ilekshon, u Symbud Myntri Rangbah u la pynpaw ïa ka jingartatien, haba ong ba um ngeit satia ïa kane ka jingkam bad ba um tip ruh ïa kaei ka tyllong.
“Ngam tip nangno phi ïoh ïa kane ka khubor. Nga dangpyrshang ban kylli na ki paralok riewsaiñ pyrthei la ki ïajan ne em bad u ne u briew hynrei ym don ba tip ïa kata. Namarkata, ban shu pynkut ïa kane ka jingkam da mano mano hi ngam don jingtip. Hynrei kaei kaba mut ban ong ha phi ka long ba kam pher phi ïajan bad u A, B, C ne D kiba don ha ka bor, hynrei phi hap ban ïaid kat kum ki kyndon ba la buh ha ki kyndon” u la ong.
