Mairang, Nailur 09
Ha ka Sngi Ba-ar, ki pulit ka Mairang Police Station hadien ka jingtohkit bad ka jingbudien ki la ïoh ban kem noh ïa uwei u briew ïa uba la suba jur ba u la donkti ban ot ryndang ïa u samla 26 snem ka rta ha ka shnong Mawlyntriang, Eastern West Khasi Hills.
Katkum ka tyllong khubor ba la ïoh lum, la ong ba ïa utei u briew ïa kaba ki pulit ki la ïoh ban kem la tip kyrteng u Linter Ryntathiang 46 snem ka rta na kajuh ka Shnong.
Shuh shuh ka tyllong khubor ki pulit la ong ba ïa utei u briew ba la ïoh kem, la rah noh ïa u sha Nongstoiñ Court ha kaba ka Court ka la buh 14 sngi ïa utei u briew hapoh ka ‘Judicial Custody’.
Ka khubor ka ong ruh ba na ka liang ki pulit ki dang bteng ïa ka jingtohkit ban lap sa ïa kiwei pat kiba donkti halor kane ka jingjia.
Lah ban kdew hangne ba katei ka jingjia ka la jia ha ka step phyrngap jong ka 6 tarik u bnai Nailur, 2025 ha ki por 4.00 baje mynstep ha kaba uwei u samla ïa uba la tip kyrteng kum u Bunsiewdor Nongrang, 26 snem ka rta na ka shnong Mawlyntriang, Eastern West Khasi Hills la suba ba u la shah ot na ryndang.
Ka khubor ka ong ba utei u samla u la wan tied jingkhang ha ïing jong ki ha ryngkat ka jingmynsaw kaba jur na ka jingshah ot u ryndang ha kaba na ka liang jong ki bahaïing mar-mar ki la pynkit ïa u sha CHC Nongkhlaw bad hadien la pynkit noh sha Nazareth Shillong namar ka jingmynsaw jur.
