Shillong, Nailur 09
Ka lahduh jong ka aïom ba la lah, ka Shillong Lajong FC ka la ïasam mar shi point bad ka Mylliem SC ha ka Shillong Premier League, hadien ba ki la ïakhaid mar 1-1 kol ha ka sngi Ba-ar ha SSA Stadium kaba ha First Ground, Polo.
Ha kane ka jingïakhun ka Mylliem SC ka la ïoh ban pynkhih jar nyngkong lyngba u Remark Kharmalki ha ka minit kaba 41, hynrei ka Shillong Lajong ka la lah ban pynphai kylla ha ka kylla miet lyngba u Ïohborlang L. Lyngkhoi ha ka minit ba 76.
Ka kol ba la thep da ka Mylliem SC ka la wan lyngba ka long bol kaba la thmu sha ka jaka kaba la don lypa u Remark, uba tang marsien ïohi ïa kane, wut u la mareh sted shakhmat, kaba hangne u rangapkol ka Lajong hapdeng ka jingartatien la un mih shakhmat ne ïeng hajuh kaba la pynlong ïa u Remark ban thep hi jlang ïa ka bol.
Kane ka jingshah thep ka Lajong ka wan ha ka khyllipmat ba kum ki rangïalehkai kim pat shym la pynleit jingmut bha ïalade, hynrei na ka liang ki rangïalehkai ka Mylliem kiba khlem tyngkai ïa la buit ka bor, ba kin da lah ban tam shakhmat da kane ka shi kol u Remark.
Haba wan ban bteng pat ïa ka kylla miet, ka Lajong ka la kiew ha ka rukom ïalehkai, ha kaba bunsien la ïohi ba kin ïoh ïa ki kabu ban shut ïa ki free-kick ne wat ki corner, kaba hangne ki rangïalehkai ka Mylliem kum u Milancy Khongstia, Wanpynshngaiñ Nongsteng ba dei ruh ki rangïalehkai ‘dien, ki la long kiba phikir bad peitngor bha ha ka bynta kaba shadien.
Pynban hapdeng ka jingïai thom naphang da ki rangïalehkai shakhmat, ka Lajong ba ka la ïoh ïa ka kabu ksair lyngba u Ïohborlang, ban ïoh ban pynphai ïa kane ka shi kol.
Hadien kane, ka jingïakhun ka la lam suki namar ba don ki khep ba ki rangïalehkai ki la thiah hapdeng madan namar ka jingmynsaw, kaba la ktah pat ïa ka jingïaid beit shakhmat ka jingïakhun.
Kumta, ha kaba kut haba phai sha ka miej ïakheiñ poiñ, ka Shillong Lajong lyngba kane ka jingïakhaid kan ïoh ban khur 8 poiñ, kaba pynlong ïa ka Nangkiew Irat ba kan ïai neh halor duh hadien ba ka la khur 10 point, bud pat sa ka Mawlai kaba don ha ka kyrdan kaba ar hadien ba ka la ïoh 9 poiñ, katba na ka liang ka Mylliem ka la don ha ka kyrdan kaba san bad khur ruh 5 point.
Ha ka sngi Balang ka jingïalehkai ka wat kaba san, kan long hapdeng ka Rangdajied United FC pyrshah ïa ka Sawmer SC, ha ka por 4:30 nohphai sngi.
