Shillong, Nailur 09
Ki seng saiñ pyrthei kiba don ha ka Liang Pyrshah ki la rai ban ym pynïeng kyrtong na bynta ka ilekshon Symbud Lam-phang jong ka Ïingdorbar Thawaiñ ka ban sa long ha ka 12 tarik u Nailur.
U Nongïalam ka Liang Pyrshah, u Dr. Mukul Sangma u la ïathuh sha ki lad pathai khubor ha ka Sngi Ba-ar ba ki jingïakren hapdeng ka All India Trinamool Congress (AITC) bad ka Voice of People Party (VPP) ka la ïalam sha kane ka rai kaba ïahap jingmut lang.
“Nga dang shu ïoh ïakren bad ki paralok jong ngi ha ka liang pyrshah kynthup ïa u Bah Ardent Miller Basaiawmoit, President ka VPP. Ha kaba kut, ka jingïakren ka la poi sha ka jingïamynjur lang ban ong ba ngin ym pynïeng kyrtong. Ai ba kan don ka ilekshon kaba khlem jingïakhun haba ïadei bad ka shuki Symbud Lamphang,” la ong u Sangma.
U Sangma u la pynpaw ba ki seng ka Liang Pyrshah kin sa pyntip ïa ka rai jong ki sha u Lamphang ka Ïingdorbar.
“Ka long ruh kaba dei, ngin pynsngew ïa kane kajuh sha u Lamphang ba ha ka mynsiem jong ka rukom treikam kaba khlaiñ jong ngi kaba la pdiang ha ka synshar paidbah jong ngi,” u la ong da kaba bynrap ba hashuwa ki la don ki ilekshon sha ka shuki Symbud Lamphang kiba khlem ka jingïakhun.
Haba kylli shaphang ka jinglah ban wanrah ïa ka ‘No-Confidence Motion’ pyrshah ïa ka Sorkar, u Sangma u la jubab, “Em”.
“Ïa ki mat lah ban pynpaw da kaba shim kabu ïa ki kyndon bapher-bapher ba la pynbiang hapoh ki ‘Rules of Procedure and Conduct of Business’ bad kiwei-kiwei ki kyndon jong ka Riti Synshar ka Ri. Haba ngi sngew ba to, katto-katne ki sienjam kiba kum kata ka jingheh ngi hap ban shim, te ngin sa pyntip sha phi hynrei na ka bynta kane ka Dorbar, em (ngin ym rah ïa ka NC pyrshah ïa ka Sorkar),” u la ong.
Kane ka ilekshon ka long kaba donkam hadien ka jingiehnoh kam jong u nongmihkhmat ba rangbah tam ka NPP na Resubelpara, u Timothy D. Shira kum u Symbud Lamphang ha ka Lah Sngi U Blei.
