Shillong, Nailur 09
U Meban Snaitang u ba dei u trai jong ki lai tylli ki kali remdor ba la shah bat ha ki bor pulit ka East Khasi Hills Distrcit (EKHD) bad u ba la shah kem ruh ha ryngkat ki 12 ngut ki Nongbud jong u kiba riam ïong ha khmat Secretariat, u la ïoh jamin noh.
Kum ban shu pynkynmaw hangne ba u samla Meban Snaitang ha ka 05 tarik u Nailur 2025 u la shah bat ha ki pulit na ka jingtah ïit ïong ïa ki kali remdor, ba kynthup ka Mahindra Scorpio rong ïong, Toyota Innova rong ïong bad ka Audi A4 rong saw bad na ka liang ki pulit ki la leit ban pynlong ïa ka jingtalasi.
Ha kane ka jingtalasi ki pulit ka EKH, ki la ïoh ban kurup ruh ryngkat ki tiar siat haduh 5 tylli ki ‘Air Gun bad 2 tylli ki ‘Air Pistol’.
Kumta ki pulit ki la rah noh ïa u samla Meban Snaitang ryngkat bad ki nongbud jong u sha Thanad Sadar ban pynlong shuh shuh ïa ka jingtohkit.
Katkum ka khubor ba la ïoh jingtip na ka liang ki pulit ki la rah ïa u samla Meban Snaitang ryngkat ki nongbud jong u sha Ïing Bishar bad ka Ïing Bishar ka la ai Judicial Custody na ka bynta lai sngi ban tohkit ïa ki.
Ki tyllong khubor ki ïathuh ruh ba u samla Meban Snaitang u la ïoh jamin noh bad kumjuh ki 12 ngut ki nongbud jong ruh ki la lait noh na patok.
