Khliehriat, Nailur 09
Ka Musniang SC ka la khur jingjop, katba ka Pamrakmai SCSC bad Bataw YWSC ki la ïakhaid ha ka lympung ïalehkai 1st Division Football League ba la pynïaid da ka East Jaiñtia Hills District Football Association (EJHDFA).
Ha kane ka jingïalehkai kaba la long ha madan artificial turf Diengshynrum kaba ha Khliehriat ha ka sngi Ba-ar hapdeng ka Pamrakmai SCSC bad Bataw YWSC ki la ïakhaid mar 1-1 kol. Ïa ka kol na ka bynta ka Bataw la thep da u Jesper Lamare ha ka minit kaba 80, katba ka Pamrakmai ka la lah ban pynïakhaid kylla lyngba u Heibor Suchiang (90+3).
Ha kawei pat ka jingïalehkai, ka Musniang SC ka la jop da 4-1 kol ïa ka Jalyiah United SC. U Eleven Biam u la thep ar kol ha ka minit kaba 29 & 68, katba ïa kiwei pat la pynbud da u Michael Rymbai (63) bad u Nikerda Dkhar (86). Ka Jalyiah United SC ka la lah ban pynphai shi kol lyngba u Bataibha Rymbai (84) hashwa ba kan mad ïa ka jingshah rem.
