Khliehriat, Nailur 09
Uwei u samla na Bataw, u Sincerity Lyngdoh (26 snem), u la mynsaw jur hadien ba u la shah pom da ka wait ha shnong Pynurkba ha ka miet 8 tarik Nailur.
Nalor ka jingshah pom mynsaw une u samla, ar tylli ki kali kiba na Bataw ruh ki la shah pynjulor ha ki briew ki bym lah satia ban ithuh.
Ka khubor ka ïathuh ba u Sincerity u la shah thombor ha ka por ba u dang wan ha lynti na ka jingthep kam shipai.
Shuh shuh ka khubor ka ïathuh ba kine ki runar ki bym lah satia ban ithuh ki la pynjulor ïa ka kali kamai ML-11-3835 bad kawei pat kaba dei ka kali shimet kaba don ïa u nombor ML-04-8163.
Ïa une u samla ba mynsaw la pynkit mar-mar sha Bataw PHC, katba na ka liang ki pulit hadien ba ki la ïoh jingtip halor ka jingjia ki la hiar mar-mar sha Pynurkba bad Bataw.
Ym lah ban tip la kane ka jingjia ka don jingïadei ne em bad ka jingïakajia jaka-puta ka Bataw bad Pynurkba.
