Shillong, Nailur 09
Ka Jaïaw Laitdom Dorbar Carrom Club ka la plie ïa ka lympung ïalehkai siat carom ba la tip kum ka Meghalaya Open Carrom Championship State Ranking Tournament 2025-26 ha ka sngi Ba-ar ha Dorbar Hall kaba ha Jaïaw Laitdom.
Ïa kane ka lympung la wan ban plie da u MDC ka Jaiaw Konstitwensi u Bah Denzil Chen kum u kongsan ha kaba la don lang u Rangbah Shnong ka Jaïaw Laitdom kum u Symbud kongsan, u Bah Banrapborlang Wahlang, Secretary ka Jaïaw Laitdom Dorbar Carrom Club, ki longkmie longkpa, ki samla haduh ki heprit kiba rit.
Ha kane ka lympung ka ban neh haduh san sngi lynter la wan shim bynta naduh ki nongïalehkai kiba la rangbah, ki samla bad wat ki hep kiba rit.
Haba ai jingkren ha katei ka sngi na ka liang u Bah Denzil u la pynshlur ïa ki samla ki khynnah ba ki dei ban pynleit jingmut ha kane ka jingïalehkai khnang ba kin lait na ki jingsniew ba bun jait namar kumba ka long mynta ka jingjyllei jong u drok u la saphriang kylleng ym tang ha ki jaka sor, hynrei wat ha ki jaka ha nongkyndong ruh.
Te kumta u la kyntu ruh ba ki dei ban trei shitom ha kane ka jingïalehkai khnang ba kin nangkiew shaphrang ha kane ka kam ïalehkai bad ba kin long kiba paw ym tang ha ka Jylla hynrei ha ki jingïakop ki ban long ha kylleng jong ka ri ruh kumjuh.
