Khliehriat, Nailur 09
Ka Saipung Block Sports Association (SBSA) ka la sdang ïa ka lympung ïalehkai ki kynthei ba tip kum ka 1st Women League Football Tournament 2025 ha ka sngi Ba-ar ha madan Lamyrsiang kaba ha East Jaiñtia Hills District.
Ha kane ka lympung la wan shim bynta da 6 tylli ki kynhun ïalehkai kiba kynthup ïa ka Bamkho-sngi United, Lumtong SC, Tluh SC, United Biate FC, Moolamylliang SA&SC bad ka Daistong SC.
Ha ka jingïalehkai jong katei ka sngi sdang hapdeng ka Lumtong United bad Bamkhosngi United ki la ïasam mar shi point hadien ba kim shym la lah ban pynkhih jar haduh kaba kut ka jingïalehkai.
Haba phai sha kawei pat ka jingïakhun kaba ar, ka Daistong United ka la pynliem noh ïa ka United Biate FC da 1-0 kol bad ïa kane la thep da ka Happily Lyngdoh ha ka minit kaba 39.
Kane ka lympung kan bteng biang ha ka 12 tarik hadpeng ka Tluh SC pyrshah ïa ka Bamkhosngi United ha ka por 10:30 baje mynstep, katba ka Moolamylliang SA&SC ïa ka Daistong ha ka por 11:30 mynstep.
