Balcova, Nailur:
Arngut ki heh pulit ki la kyllon iap bad arngut kiwei pat ki la mynsaw ha ka jingjia synreit kuli ha kawei ka thanat pulit hajan ka nongbah Izmir ha Turkey ha ka Sngi Nyngkong, ha kaba la kem ïa uwei u khynnah shynrang uba dang 16 snem ka rta uba la suba don kti ha katei ka jingjia.
U Myntri kam poh-ïing u Ali Yerlikaya u la ong ba ka jingshah thombor kaba shyrkhei ha ka thanat pulit ha Balcova, ka distrik kaba don sha ka phang Sepngi jong katei ka nongbah, kaba la wanrah ia ka jingiap jong 2 ngut ki heh pulit bad uwei pat uba la mynsaw jur ha katei ka jingjia.
Haba ai jingkren sha ki lad pathai khubor ha katei ka jaka, u Lat ka Izmir, u Suleyman Elban, u la iathuh ba utei u briew u sah ha kajuh ka surok bad ka thanad bad u la mynsaw ha ka por ba ki kem ia u.
“U suba don kti ha katei ka kam pyniap briew u dei u khynnah uba dang 16 snem ka rta uba don ha katei ka surok. Um don kano- kano ka dak sniew pyrshah ia u ne ka jingshah kem teng jong u mynshwa halor kano- kano ka kam runar,” la ong u Elban ha ki nongthoh khubor bad kiwei kiwei ki lad pathai khubor kiba don ha katei ka jaka, da kaba ong ba ia utei u samla la “kem ryngkat bad ki jingmynsaw”.
“Ngi la iohi bun ki kuli thylli…bad ki don bun ki tyndong kuli” jong ki kuli bym pat pyndonkam, u la bynrap, da kaba ong ba utei u briew u la pyndonkam “ia ka suloi kaba u kpa jong u u la thied 10 snem mynshwa”.
katkum ka Footage ba la pyni da ka Gercek Gundem news website ka la pyni ia ka mobile phone video jong uwei u briew uba phong ia ka balaclava, ka top kaba lieh bad ka trok rong saw kaba mareh lyngba ka lynti iaid kjat da kaba rah ia ka suloi bad nangta u la rung shapoh kawei ka iing.
Kawei pat ka clip kaba la pynmih paidbah ka pyni ia u nongthombor ba la kynnoh ba u thiah ha ka lynti iaid kjat ba la sumar da ki nongsumar.
U la paw ba u la sngewthuh hynrei ka tduh jong ka trok jong u ka la rben da ka snam bad ki kuli kiba bun ki la sahkut ha madan.
Ka clip kaba lai ka pyni ia ka kynhun ki riew paidbah kiba iarap ban pynrung ia utei u briew ha ka kali pulit.
Ki pulit ki la iaid paidbah mardor ha kylleng ka thain, da kaba pynjari ia ki lad pahara kiba pyrkhing bha, la iathuh ki lad pathai khubor.
U myntri ka tnat aiñ, u Yilmaz Tunc, u la ong ba u nongmudui paidbah ba hakhmat duh jong ka Izmir, u la plie ïa ka jingtohkit, kaba kynthup ïa ka kynhun jong ki nongmudui, kiba don 8 ngut, ha ka post ha ka X, ha kaba bun ki myntri, ki la pynrem jur ïa katei ka jingshah thombor bad ki la phah ïa ka jingsngewlem sha ki bahaïing hasem jong kiba la khlad noh.
