France, Nailur:
Utei u doktor na France, uba la shah kynnoh ba u la thmu ban pyniap ïa ki 30 ngut ki nongpang khynnah bad ki rangbah, ha kaba 12 ngut na ki, ki la duh syndon ia ka jingim na ki kam bym-man jong utei u doktor, u la shah ialam hakhmat ka ïingbishar ha ka Sngi Nyngkong, ha kaba, hashwa ba yn bishar ia u, u la thet kti ba um don jingkitkhlieh halor katei ka kam ba la pharep pyrshah ia u bad ba um shym la pyn jynjar ne pynshitom ia kitei ki nongpang kumba la kynnoh ia u.
U Frederic Pechier, uba la don 53 snem ka rta, u la trei kum u doktor ha ki ar tylli ki jaka sumar ha ka nongbah Besancon, kaba don sha ka Phang Mihngi jong katei ka nongbah, ha kaba, la kynnoh ba u la ai bih bad shim jubor ia ka jingim jong kitei ki nongpang kiba ngat sumar ha ka kti jong u hapdeng ki snem 2008 haduh 2017. Napdeng baroh kiba u la leh ia katei ka kam dusmon, 12 ngut ki dei kiba la khlad noh syndon bad kiba ym shym la lah shuh ban pyllait im wat hadien ba la lap ia ki dak jingshitom ha ka met jongki.
La kynnoh ba u la ialeh ban ai da ki jingsumar ki ban wanrah ia ka jingpang kyndit ha kitei ki nongpang kiba hap ha ka jingkhmih jong u, khnang ba un ioh ban pyni ia ka jingtbit jong u ban pynim biang ia kiba ioh ia katei ka jait jingshitom bad ha kajuh ruh ka por ba un ioh ban pynjah burom ia kiwei pat ki para doktor kiba iatrei lang ha katei ka jaka bad u.
U nongpang uba dang rit tam uba u Pechier u la pynshitom, u dei uba dang 4 snem ka rta, ia uba la ithuh kyrteng kum u Teddy, u la lait im arsien na katei ka jait jingshitom kyndit kaba la pyn-urlong hi da utei u doktor ha u snem 2016. Katba u nongpang ba la rangbah bad tymmen tam eh, uba la shah pynshitom beiñ ha utei u doktor u dei u tymmen uba don 89 snem ka rta.
Ka jingbishar ka pynkut ia ka jingtohkit kaba la neh 8 snem kaba la pynkyndit ia ki nongsumar, ha kaba u Pechier u la kyntait ia katei ka jingkynnoh bad ong ba um ju don jingmut da lei-lei ruh ban leh ia katei ka kam pyniap bad lane ka kam kaba buh jingma ia ka jingim ki briew.
La pdiang sngewbha ia u Pechier ha ka jingwan jong u ha ka iingbishar da ki katto katne kiba ha ïing- ha sem, kynthup ia uwei uba la pyrta: “To wan, Fredo.”
U Pechier, uba don lai ngut ki khun, un set patok syndon baroh shi jingim, lada shah rai pynrem bad lada ka ïingbishar ka lap ia ki sabut kiba biang haba iadei bad katei ka jingleh pynkheiñ aiñ jong u. Ia mynta hi, ym pat shym la set ia u ha patok hynrei u don hapoh ka jingpeit jong ka ïingbishar, ka lad ban shah set phatok shwa ban bishar.
