Shillong, Nailur 09
U Myntri Rangbah ka Jylla, u Conrad K. Sangma u la pyntip sha ka Ïingdorbar ba ka Sorkar Jylla ka dang ïaid shakhmat haba ïadei bad ka skhim sam umdih bathymmai ha Shillong ne ka New Shillong Water Supply Scheme (NSWSS), ha kaba la mang T.700 klur.
“Ka NSWSS ka la don ha ka kyrdan kaba shakhmat bad ngi kyrmen ba kan nang ai jingsuk shuh-shuh ha ka liang ka jingpynpoi um ha Shillong bad ki jaka ba marjan,” la ong u Sangma.
U Myntri Rangbah u la kdew ba ka projek um ka Wahrynthem, ka ban pyndap ïa ka um haduh 33 ‘million’ litar ha ka shisngi, ka dang don ha ka jingthmu, ha kaba ïa ka Wah Umngot ha Dawki la pyrkhat ban long kum ka tyllong. Kane ka projek la khmih lynti ba kan ai jingïarap halor ka jinglong-jingman ka jingpynpoi um ha kane ka thaiñ.
U Nongïalam ka Liang Pyrshah, u Dr. Mukul Sangma u la pynpaw ïa ki jingsngewkhia halor ka jingpynneh-pynsah ïa ki tyllong um, da kaba buh jingmut ïa ka jinglong-jingman bad ka jingkylla suiñbneng.
Haba jubab, u Myntri Rangbah u la pynpaw ïa ki jingpyrshang jong ka Jylla ban weng ïa kine ki jingeh lyngba ki Externally Aided Project (EAPs) kiba pynleit jingmut ha ka jingpynïaid ki jingdon-jingem mariang, ka jingpynkhie im ïa ki tyllong um, bad ka jingïada ïa ki jaka pynlang um.
U Myntri Rangbah u la ban jur ruh halor ka jingdonkam jong ka Meghalaya Climate Council, kaba la khmih da ma u hi bad kaba kynthup ïa baroh ki tnad treikam kiba ïadei bad kane ka bynta.
“Ïa ka Council la ïalam da ka ‘State Water Policy’ jong ka Jylla, kaba la pdiang ha u snem 2019. Ngi dei ka Jylla kaba nyngkong eh ban pdiang ïa ka ‘Water Policy’,” ong u Sangma haba bynrap ba ka Sorkar ka dang trei ban pyntikna ïa ka jingpynneh-pynsah jong ki tyllong um, khamtam haba ïakynduh ïa ki jingeh kiba ïadei bad ka jingkylla suiñbneng.
U Myntri Rangbah u la kdew ruh ïa ka jingeh ba ki nongrep bad ka Jylla ki ïakynduh namar ka jingduna slap haduh 50% mynta u snem. Wat hapdeng kine ki jingeh, ka Sorkar ka pyntreikam shit rhem ïa ki projek ban pyndonkam ïa ki tyllong um bapher-bapher bad ban shimkhia ïa ka jinglong-jingman jong ka jingpynbiang um ha ka Jylla, u la ong.
Hashuwa, ha ka jubab jong u halor kane ka phang, u Myntri ka tnad Public Health Engineering (PHE), u Marcuise N. Marak u la pynbna ba ïa ka Greater Shillong Water Supply Scheme (GSWSS – III) kaba la ap khmih lynti yn pyndep noh hapoh u Lber jong u snem ban wan.
U la ïathuh ba ka jingdonkam um dih man ka sngi ha nongbah Shillong kynthup ïa ki jaka bym hap hapoh ka Greater Water Supply Scheme (Phase I & II) ka long 5,58,30,000 litar. Ka jingdon jong ka um dih ha Shillong baroh kawei ka long 4,17,80,000 litar.
Ka jingduna um dih ha nongbah Shillong ka long 1,40,50,000 litar.
Haba ïadei bad ka Mawlai, u Marak u la ong ba la pynbiang 64,75,000 litar ka um dih man ka sngi katba ka jingduna ka long 27,75,000 litar (2.78 million litar shisngi).
“Ha kaba ïadei bad ka Mawlai, kawei ka skhim hapoh ka JJM, kata ka Umshillong, Lummawnei, Umthlong, Mawïong & B1-13 WSS ka dang ïaid bad katto-katne ki skhim ki dang ïaid shakhmat,” u la bynrap.
