Shillong, Nailur 09
Ka Meghalaya Association of Kick-boxing Organisation (MAKO) ka la pan jingpynshai na ka Meghalaya State Olympic Association (MSOA) halor ka jingshah kyntait kane ka synjuk na ka jingïalang kaba la long dangshen na ka bynta ban ïathaw noh tang da kawei ka synjuk ïalehkai hapoh ka Jylla.
Kane ka la wan hadien ba ka MSOA ka la lum jingïalang ha u Naitung mynta u snem ïa ki ar tylli ki synjuk ïalehkai Kickboxing ka Jylla, kata ka Meghalaya State Kickboxing Association (MSKA) bad ka All Meghalaya Kickboxing Association (AMKA).
Ka jingkhot ïa ka MSKA hapoh ka jingïalam u Bah Lorenzo Pearson Warjri (Working President) bad ka AMKA hapoh ka jingïalam u Bah Samuel Hashah (President), ka la wan hadien ba kine ki ar tylli ki synjuk ïalehkai ki la phah jingthoh sha ka MSOA na ka bynta ban ïoh ïa ka jingithuh.
Kat kum ka shithi ba ka phah da ka MAKO ha ka 9 tarik mynta u bnai sha ka MSOA, ka la pan jingpynshai na kane ka synjuk halor ka jingbym shah khot sngewbha sha katei ka jingïalang ne ka khlem da pan jingmut lem halor katei ka jingthmu.
Kat kum katei ka shithi ba la phah da u Baremdor Kharmuti, General Secretary ka MAKO, la ong ba ïa katei ka synjuk la seng da u Bah Donny Rapheal Ranee ha u snem 1996. La ong ba ka la ïoh ka jingithuh na ka tnat ïalehkai ka Sorkar Jylla ha u snem 1998 bad la ong ba ka la lah ban kyntiew ïa kane ka jingïalehkai kickboxing ha ka Jylla la kumba 27 snem.
“Ngi sngewlyngngoh ba ha ka jingpynbna dangshen da ka MSOA bad ka tnat ïalehkai ba ka la phah ban ïathaw tang kawei ka synjuk ïa ka MSKA bad ka AMKA, katba ka MAKO kaba dei ka synjuk ïalehkai kaba la rim tam ha ka Jylla ka la shah kyntait noh. Na ka bynta ka jingbit jingbiang bad ka jingmyntoi jong ki nongïalehkai ngi kyrpad ba dei ban don bynta lang ha ka ban shim ïa kano kano ka rai,” la bynrap katei ka kyrwoh.
Ym lah ban len ka Jylla ka la don haduh lai tylli ki synjuk ïalehkai kickboxing kata ka AMKA, MSKA bad ka MAKO. Baroh lai tylli kine ki synjuk ki la pynïasoh ha la ki jong ki synjuk ïalehkai jong ka ri India bad wat shabar ri ruh kumjuh.
Da kane ka jingpynïasoh ha la ki jong ki synjuk ka la lah ban wanrah ka jingeh kaba khraw na ka bynta ban pynïatylli lang kawei ïa ki, hynrei ka jingeh kaba kham khraw kan dei ïa ki nongïalehkai ha kaba ki lah ban duh ïa ki lad jingïarap ne jingbei tyngka na ka Sorkar Jylla.
