Imphal, Nailur:
Ki pulit jong ka Manipur ki la bteng ïa ka jingtreikam kaba jur ha kylleng ka jylla, da kaba thmu ban ïakhun pyrshah ïa ki kam runar kiba ïadei bad ki kali, ki dawai pynbuaid, ki kyiad, bad ki kam lehnoh. Ka jingïakhih, kaba la pynlong ha kine ki ar sngi ba la dep, ka la pynlong ïa ki jingkem bad jingkurup kiba kongsan.
Ha ka 8 tarik Nailur, ki pulit ki la ai 88 tylli ki Challan sha ki nongpynkheiñ aiñ kali, ha kaba ki la lum ïa ka kuna kaba kot sha ka T.1.27 lak. Shisngi shwa, la weng noh ïa ki phlim ba ïong na ki saw tylli ki kali ha ka por ba pynlong ïa ka jingpynjari aiñ kaba kyrpang.
Ha ka jinglap kaba khraw, la ïoh ban kem ïa arngut ki nongkhaïi drok – u Thanglunpau Sukte (32) bad u Hauginlian Phaipi (35) na ka shnong Suangdoh ha Churachandpur distrik, na kawei ka khyrdop talasi kaba don harud surok Guite, NH-102B.
Ki pulit ki la ïoh kurup haduh 176 tylli ki song sabon kiba don 1.9 kg u drok brown sugar bad ka kali saw shaka ha ka jingpyntreikam ïa ka jingkhynra.
Ha kane ka juh ka sngi la ïoh ban kurup 23 liter ka kyiad DIC na Mahabali ha Imphal East bad la kem ruh ïa 7 ngut ki briew. Ha kawei pat ka jingkhynra ha Keirao Louthok Loukon, ki pulit ka Irilbung ki la lap ïa kawei ka jaka ba la shna shipor ban thep bilor ïa u drok Opioid Codeine.
Ki bor pahara ki la kurup ïa kawei ka Mashin thep bilor, ki synduk plastik, 1,461 tylli ki bilor thylli, 185 tylli ki bilor ba la pyndap da ka jingsuba ba ki dei ki Codeine, bad kiwei kiwei ki tiar.
Ki pulit ki la ïoh ban kem ruh ïa u Aribam Mansish ba 23 snem ka rta na Imphal East ryngkat bad u Ganja uba khia 1.94 kg, katba uwei u dkhot ba dang treikam bha jong ka KCP (Apunba City Meitei) u Adhikarimayum Satish Kumar (20) la ïoh ban kem ryngkat bad kawei ka Bullet bike, ki mobile phone, bun tylli ki sim card bad ki PAN, ki Aadhaar Card.
Uwei pat u lehnoh uba la tip kyrteng kum u Sagolsem Amarjit Singh (47 snem ka rta) ba la tip ruh da ka kyrteng kum u Surendra bad kum u Sagar jong ka RPF/PLA u la shah kem na Imphal West namar ki kam dawa pisa kiba thmu ïa ki skul bad ïa ki paidbah. La kurup ar tylli ki mobile handset bad ka Aadhaar card jong u.
Ha kajuh ka por, ki bor pahara ki la pynthikna ïa ka jingïaid lynti kaba suk jong ki 130 tylli ki kali kiba kit ïa ki marbam ba kongsan ha ka surok NH-37.
La buh haduh 113 tylli ki jaka talasi ha kylleng ki distrik ha baroh ar ki jaka lum bad wah, watla ym shym la don ba shah kem.
Ki pulit ka Manipur ki la pynpaw biang ïa ka jingkular jong ki ban pynjur ïa ka jingkhynra bad ban pynneh ïa ka jingpahara kaba pyrkhing bha ha ki jaka ba don jingma ban tehlakam ïa ki kam sniew bad ki kam lehnoh ha kylleng ka jylla.
