Jowai, Nailur 10
Ka Nongkhroh Krem Kum ka la pynliem noh ïa ka Heiboriong-I FC da 3-0 kol na ka bynta ban khur ïa ka jingjop ha ka Super Division Football Tournament (Kelsiroy Pala Memorial) ba la pynïaid da ka Thadlaskeiñ Sports Association (TSA) ha ka sngi Balang ha Wahïajer Multi Sports Complex.
Kane ka nam jop ka la wan urlong lyngba ki kol ba la thep da u Anthony Mynsong Lawan Kmah bad Johnson Marbaniang.
Watla baroh ar ki kynhun kim shym la lah ban pynkhih jar ha ka kylla step, hynrei da ka jinglah ban ïalehkai bha ki rangïalehkai ka Nongkhroh Krem Kum ka la pynlong ba kan ïoh ban thep kol nyngkong ha ka kylla step lyngba u Anthony Mynsong ha ka minit kaba 62.
Katei ka kynhun ka la pynbud biang ïa ka kol kaba ar lyngba u Lawan Kmah ha ka minit ba 67 bad ïa ka kol kaba khatduh la thep da u Johnson Marbaniang (75) na ka bynta ban khur syndon ïa ka jingjop.
Ha ka sngi Palei ka jingïalehkai ha ka Super Division kan long hadpeng ka Pohskur Phlongïingkhaw pyrshah ïa ka Nongkhroh Rim.
