Itanagar, Nailur:
Ka Supreme Court ha ka 8 tarik, Nailur, ka la bthah ïa ka sorkar pdeng ba kan ai ïa ka jubab hapoh lai taïew halor ka mukotduma Public Interest Litigation (PIL) kaba kynnoh ïa u Myntri Rangbah ka Arunachal Pradesh u Pema Khandu ba u la ai kontrak sorkar ïa kiba haïing-hasem ba jan jong u.
Ka kynhun nongbishar jong u Justice Vikram Nath bad u Sandeep Mehta ki la kdew ba katba ka sorkar jylla ka la dep ban ai ïa ka Affidavit jong ka katkum ka hukum jong ka ïingbishar bahakhlieh duh jong ka 18 tarik u Lber, hynrei ka sorkar pdeng kam shym la lah ban leh ïa kane. Ka la kyntait ïa ki jingpyrshah ba ïadei bad ka jingstad ba la pynpaw da u nongïasaid aiñ jong ka sorkar pdeng bad ka la ong, “Kane ka ïingbishar ka la ai jingbthah ïa phi. Buh ïa ka Affidavit. Wat ïathuh ïa ngi ïa kine ki buit baroh.”
Ka PIL, kaba la mudui da ki seng trei mon sngewbha ka Save Mon Region Federation bad ka Voluntary Arunachal Senaa lyngba u nongïasaid aiñ u Prashant Bhushan, ka la kynnoh ba “ka jylla Arunachal Pradesh ka dei kaba la pynïaid da u Myntri Rangbah kum ka Private Limited Company jong u,” da kaba kam ba baroh ki kontrak kiba heh la ai sha ki kompeni kiba ïadei bad ka ïing ka sem jong u.
U Bhushan u la kdew ïa ka kaiphod jong u Comptroller and Auditor General (CAG) bad u la pynbor ba ka Affidavit jong ka sorkar pdeng ka dei ban jubab ym tang ïa ka dorkhas hynrei wat ïa ka Affidavit jong ka jylla bad ïa ki jinglap jong u CAG.
Ka jingkyrpad ka la jer kyrteng ïa u Khandu, ka kurim ba ar jong u kpa jong u, u Dorjee Khandu ba la khlad noh, ka Rinchin Drema bad u khun ksiew jong u, u Tsering Tashi, napdeng ki nongshah mudui. Ka la kynnoh ba ka kompeni jong ka Drema, ka Brand Eagles, ka la ïoh shibun ki jingïateh sorkar ha kaba pynkheiñ ïa ki kyndon jong ka jingïaleh pyrshah.
Katba u nongïasaid aiñ jong ka Arunachal Pradesh u la kyntait ïa ki jingkynnoh kum “ka jingmudui ba la kyrshan” bad u la kynnoh ba ki nongmudui ki “tih ïa ki shyieng na ka almari haba ym don satia,” ka ïingbishar ka la ïohi ba katei ka kam ka donkam ban bishar bniah.
Ka ïingbishar ka la ai por ïa ka Synjuk India lai taïew ban aiti ïa ka jingpynskhem jong ka, da kaba kdew ba ka CAG ka la dep ban aiti ïa ka kaiphod jong ka, bad ka la ailad ïa ki nongmudui ban jubab ïa ka jingpynskhem jong ka jylla. Ïa kane ka mukotduma yn bishar hadien lai taïew.
