Raphael Warjri
Ha ka imlang sahlang ki don laiphewjait ki jinglong shimet lada dei ka longkmie shimet ne u longkpa shimet, lane ki khun ki kti kynthei bad shynrang ha la shimet shimet. Kumta ka long kaba donkam ba yn marmlien ban syllok hapdeng ki kmie ki kpa bad la ki khun man la ka por na ka bynta ban ioh ïa u soh jong ka jingsngaiñ ka jingim la ha ka kamai kajih ne ha ka burom akor markylliang.Ki kmie ki kpa kim dei ban dawa burom na la ki khun bad ki khun ruh kim dei ban saitlah ïa la ki kmie ki kpa ha manla ki khep ba dei ban tehsong ïa ka longïing longsem. Kaba donkam ka long ba ki kmie ki kpa ki dei ban kamai burom na la ki khun da ki nuksa lajong ha kaba ki synshar la ka jingim ba manla ka sngi bad da kata ka rukom ki khun ki kti ki sa nang ban shynraiñ ïa la ki kmie ki kpa. Ym lah ban len ba ha ka jinglong briew ki don kiba khluh ban leh ki kam kiba saitmet hakhmat jong kiba bun ba lang, hynrei ym lah lait namar ba ym ju don koit ki briew shimet ki ban biang pura bad paka nadong shadong ha ka longïing longsem. Lada kita ki kam ki long kiba leh da kaba adkar, kata te lah ban ioh ka jingshañiah markylliang lada dei ki kmie ki kpa na la ki khun ki kti lane ka lah ban long hapdeng ki shijur jong ka longkmie bad u longkpa, bad ka lah ruh ban long hapdeng ki shipara, hynmen para la kynthei ne shynrang.
Ki don ki jinglong tynrai jong ki kynthei ne shynrang lada kum ki rangbah ha ka kyrdan longkmie longkpa lane ki samla bad ki khynnah khyllung kumjuh. Lada kita ki jinmlien ki long hapoh u pud ba lah ban pdiang da ka imlang sahlang lada dei ba ki long adkar bad lah ban sharai ïa lade, kata ym lah lait ha man la ki bynriew, hynrei lada dei ki jingmlien kiba khyllah bad jahburom hakhmat ka imlang sahlang kata te ym lah da lei lei ban pynksan khamtam lada dei ka sang ka ma. Ka jinglong kyrni ha kano kano ka kam basniew bunsien ka pynlong ïa kita kiba marmlien ba kin leh buhrieh bad kiar na la ki paradkhot ha la ka longïing longsem lajong.
Lada don ki longkpa kiba kyrni ha ka kyiad, ki dei ban sngewthuh hi da lade ban long adkar khnang ban ym diaw ka longkmie bad ki khun ki kti. Kiba nang ban adkar ha kane ka liang ha ka jaka ban mih ka kynroi, ka tim ka tla bad ka shoh ka dat, lah ban kyrsoi pynban da ka biria birai ka tamasa ban pyntngen ïa la ka tnga bad kmen ki khun ha la ka longïing longsem. Lada don ki longkmie kiba kyrni ha kano ka no ka kam thala ruh kumjuh ki dei ban sngewthuh hi da lade ban long adkar khnang ban ym bynñiaw u kpa ki khun bad ki khun ki kti. Kiba nang ban adkar na kano kano ka kam thala, lah ban kylla long pynban kaei kaei kaba bha, ka ba phuh ba phieng bad ka kmen ka risa na ka bynta ka longïing longsem. Ha kajuh ka rukom kan long ruh na ka bynta ki khun ki pyrsa ba kin long adkar barabor na kino kino ki kam thala, khnang ban long ka kmen ka risa, ka suk ka saiñ ha ka longïing longsem.
Kaei kaba ban jur ïa ka imlang sahlang ha kane ka juk mynta ka dei ka kam thala ba mih na kaba kyrni ha u kani u aphin (drugs), khamtam hapdeng ki khynnah bad ki samla. Kane ka jingkyrni ym dei tang ba syrtok kita ki ba dih, hynrei syllang sa ka longïing longsem bad kumba la phriang mynta lei lei la suwan sa ka imlang sahlang shityllup ka Ri Khasi. Ka ba sngewtriem palat ka dei ba la pur stet katta katta shaduh sha ki nongkyndong ruh haduh ba ym tang ka longiing longsem kaba shong syier hynrei ki shnong ki thaw baroh namar ba na kaba jrah bad threw ban dih aphin ka lam sha kiwei kiwei pat ki kam thala kum ha ka tuh ka thiem, ka lute ka klop, ka shoh ka dat bad lehse ka lah ban lam sha ka kam pyniap pynmynsaw briew, khamtam ïa kiba lui lui. Kano kano ka kam ba sniew ba smeh, ba thala thaleiñ haba ka ktah ïa ki katto katne bad ym pur shawei shaar, kata ka dang biang ba lah ban teh lakam bad ban husiar na kino kino ki rukom ba lah ban pur ka jingsniew shawei shawei. Hynrei ka jingeh bad shyrkhei kane ka kyrni aphin ha kane ka juk mynta ka long ba la saphriang katta katta sha kylleng ki kyndong kynshrot jong ki shnong ki thaw, haduh ba la jynjar ban sangeh bad ban pynduh pyndam ïa kane ka jingmlien ba kynshia.
Ki don ki kmie ki kpa kiba ieit thep mynsiem ïa la ki khun haba ki hap ha kane ka lanot ban kyrni dih aphin, bunsien ka lam pynban sha ka ban da burom ïa la ka longïing longsem da kaba len na ka imlang sahlang bad kaba kham sniew ka long ban kynoi pynban ba kin nang ngam sha ka liewlep jong ka jynjar trah. Ki don ki kmie kiba ieit tyngeh ïa la ka khun ne u khun kiba kyrni ha ka dih aphin, ha ka jaka ban syllok bad ki shlem sumar ne ha ka shnong ka thaw, hynrei ki pynshlur pynban ïa la ki khun ba kin dang ïaineh ka jinglong kyrni, na ka daw ba ieit khun eh ka kmie. Kata ka pynkjeh khun ka long pynban kumba ïalam ïa la ki khun ba kyrni dih aphin ba kin dang tynrong shuh shuh ka jingeh ha ka longïing longsem.
