Nongpoh, Nailur 10
Hadien kumba lai bnai eiei ba uwei u rangbah na ka shnong Ummar jong ka thaiñ Patharkhmah u la jah rngai katba u dang leit shabar harud ka surokbah National Highway 6 ha Umran, ïa ka met kaba sah jong u la lap noh na kawei ka khlaw marjan bad ka 6th Meghalaya Police Battalion ha Umran.
Katkum ka tyllong khubor ba la ïoh lum, la ïathuh ïa ka met kaba sah jong utei u rangbah, ïa uba la tip kyrteng kum u Carlus Tron, kaba don sa tang ki shyieng suda, la lap nyngkong da ki nongleit Thohdieng ha ka sngi Nyngkong kiba la pyntip pat sha ki nongïalam shnong bad ki bor pulit ka thanad Umsning.
Na ka liang ki pulit ka thanad Umsning hynnin ka sngi, ki la leit ban shimti noh ïa katei ka met kaba sah jong utei u rangbah ban pynlong ïa ka jingtohkit bad na ka liang ki bahaïing hasem ruh kiba la wan poi ha ka sngi Balang, ki la pynthikna ba katei ka met kaba sah ka dei jong u Carlus Tron lyngba ka jaiñ phong ka jong u.
Hadien ba la pyndep ïa ki jingdonkam katkum ki kyndon jong ka aiñ, ki pulit ka thanad Umsning kila aiti noh ïa ka met kaba sah jong utei u rangbah sha ki bahaïing hasem ba kin pyndep ïa ka jinglehniam lehrukom khatduh.
Kumban shu ïathuh biang, utei u rangbah u la jahrngai kyndit hadien ba u la hiar na ka kali ban leit shabar harud ki bynta jong surokbah National Highway 6 ha Umran ha ka janmiet jong ka 11 tarik u bnai Jylliew mynta u snem hadien ba u la dep ban wan buh ïa la ka lok kaba armet ha Ganesh Das Hospital, Shillong bad thmu ban leit phai sha la shnong.
