Shillong, Nailur 10
U Myntri Rangbah ka Jylla Conrad K Sangma u la ai ka jingkular ba ka Sorkar Jylla ka la shim ïa ki lad ki lynti kiba tyngeh ban weng ïa ki jingeh kiba ïadei bad ka jingwan buhai shnong beaiñ jong ki briew ba nabar.
Haba jubab ïa ka cut motion hapoh ka ïingdorbar thawaiñ ha ka sngi Balang, u Conrad u la ong ba ka Sorkar ka la ju ïakynduh man ka por bad ki nongïalam bapher bapher kynthup ruh ïa ki shipai pahara khappud (BSF) bad Intelligence Bureau (IB), ban pynïasoh lang ïa ki jingpyrshang ban khanglad ïa ka jingwan rung tuh.
U Myntri Rangbah u la pyntip ruh ba ka Sorkar ka la pynbun ïa ki briew ha ki jaka talasi bad pynthikna ïa ka jingïadon bynta jong ki paidbah ban ïada na ka jingwan rung tuh jong ki briew.
“La bthah ïa ki Deputy Commissioner (DC) ha ki thaiñ khappud ba kin ïatreilang bad ki shnong ki thaw bad ban pynbiang ïa ki jingkyrshan ban khanglad ïa ka jingwan buhai shnong beaiñ,” u la ong haba bynrap ba ka Sorkar jylla bad ki BSF ki la trei shitom bha ban pynlong ïa ka jingkhynra ha ki surok bah bad kiwei kiwei ki jaka, kaba la pynlong ïa ki katto katne ngut ki riew shimet ban shah kem.
Katkum ka jingong jong u, ka Sorkar kam shym la shu peitkai ïa ka jinglong jingman hynrei ka la shim ïa ki sienjam kiba skhem ban peit ha ki khappud bad ban ïada na kino kino ki jingkulmar.
U Myntri Rangbah ka Jylla u la ai ka jingkular ba ïa ki jingïakren halor ka jingshngaiñ ha ki khappud bad ka jingwan buhai shnong be-aiñ la rah sha ki bor bahalor jong ka Sorkar India.
Shuh shuh u Myntri Rangbah haba bynrap u la ong ruh ba watla ki katto katne ki bynta ba ïadei bad ka jingshngaiñ ki dei kiba hapoh bad ym lah ban ïasam paidbah, hynrei ka Sorkar ka thmu ban pynthikna ïa ka jingpahara bad ka jingshngaiñ ha ki khappud jong ka jylla.
