Khliehriat, Nailur 10
Ka Rymbai Synrangshahkhaiñ SC bad Sutnga Mission SSC ki la khur jingjop ha ka 1st Division Football Tournament ba la pynïaid da ka East Jaiñtia Hills District Football Association (EJHDFA) ha ka sngi Balang ha madan artificial turf Diengshynrum, Khliehriat.
Ha ka jingïalehkai kaba nyngkong, ka Rymbai Synrangshahkhaiñ SC ka la pynliem noh ïa ka Rymbai Madanpynriang SC da 4-1. Ïa ka kol jong ka Rymbai Madanpynriang la thep da u Rimiki Rymbai (35), katba ïa ki saw tylli ki kol jong ka Rymbai Synrangshahkhaiñ la thep da u Lalgugin Latjem (20 & 90+2), Ferdinand Nongtdu (68) bad u Seigaohao Dimngel (81).
Ha ka jingïalehkai kaba bud, ka Sutnga Mission SSC ka la pynliem noh ïa ka Mukhaïalong SCSC lyngba ka shi kol ba la thep da u Carmon Suja ha ka minit kaba 87.
Ha ka sngi Palei ka jingïalehkai kan long hapdeng ka Khliehriat West YWSC pyrshah ïa ka Wahïajer Narpuh SSC ha ka por 11 baje mynsngi, katba ka R. Ïawpynsing SC ïa ka Ïatyllilang SC Hingaria ha ka por 2:15 nohphai sngi.
