Shillong, Nailur 10
U Myntri Rangbah ka Jylla u Conrad K Sangma u la kyntait ban kynthoh eiei ha kaba ïadei bad ka jinglah ban don jong ka jingbujli Myntri, da kaba kdew ba mynta ka dang ka dorbar synrai kaba dang ïaid shakhmat.
U Conrad u la ong ba un sa kren bad batai sha ki lad pathai khubor halor kiba bun ki bynta, kynthup ruh ha kaba ïadei bad ka kam bujli Myntri, hadien ba la kut ka jingshong dorbar synrai.
“Ka dang kloi palat ban ong eiei ïa mynta, ngi dang don ka dorbar synrai kaba dang ïaid shakhmat mynta. Hadien ba la kut ka dorbar synrai, ngan sa kren sha phi ïa baroh ki bynta,” u la ong sha ki lad pathai khubor.
Ha kaba ïadei bad ka jingthep kyrteng jong u Limison D. Sangma kum u kyrtong ban ïakhun ïa ka shuki Deputy Speaker, u Conrad u la pynthikna ba u Limison u dei u kyrtong ïamonlang jong ka Meghalaya Democratic Alliance (MDA).
U la ong ba ka seng ka la ïakren hapoh ka seng halor ka kyrteng jong u bad ki nongïalam kiba bun bad la rai ba u Limison u dei uba la kham rim bad don ka jingtbit ha ka Sorkar bad ka ïingdorbar bad kumta u la long u kyrtong uba biang bha na ka bynta kane ka shuki.
