Shillong, Nailur 10
U President ka All Khasi Meghalaya Tourist Taxi Association (AKMTTA) u Bah Recaldinus Dohling u la pynthikna ba ka seng kan ïaid beit shakhmat ban nym shah ïa ki kali na Assam ban leit sha ki jaka jngohkai pyrthei.
Kane ka jingpynthikna, ka dei hadien ba ka Synjuk Ki Trai Bad Ki Nongniah Kali Kamai Ka Bri U Hynñiewtrep kaba dei ka kynhun jong Association kali kamai baroh naduh ki trok haduh ki ar shaka ki la leit ban ïakynduh ïa u CEM ka KHADC, u Bah Shemborlang Rynjah ha ka 10 tarik Nailur, 2025.
Kane ka dei hadien ba ka jingïakhih jong ka All Khasi Meghalaya Tourist Taxi Association (AKMTTA) kaba ki la pynsngew ba kin pyrkhing noh ïa ki kali kamai kiba wan na shabar ban rung sha ki jaka jngohkai pyrthei.
Ki nongïalam kiba hakhmat jong ka Synjuk ki la buh ruh da ka shithi kaba ki la kyrpad ïa ka Council ba kan peit lang noh ïa ka jingeh jong ki trai ri da kaba pynskhem ïa ka United Khasi Jaiñtia Hills District (Trading by Non-Tribals) Regulation, 1954 (As Amended), Section 3A (1) (b) kaba la kdew ba kino kino kiba leh business (kaba kynthup ruh ïa kiba kamai kali) ba ki dei ban don noh ïa ka Trading License haba ki kamai ha ki jaka kiba hap hapoh ki jaka ka Sixth Schedule .
Na ka liang u CEM ha kaba ïadei bad kane ka jingdawa ka Synjuk, un sa shong kyrkieh bad ka tnat Trade ban wad ïa ki lad ki lynti.
Haba kren sha ki lad pathai khubor u President ka AKMTTA u Bah Recaldinus Dohling u la ther tyngeh ïa ka sorkar halor ka jingthmu pynmih sa 200 tylli ki kali PRIME ba ïarap ka sorkar da kaba ong ba ka sorkar ka thmu ban pynbiej ïa ka Synjuk ban klet noh ïa kane ka jingïakhih hynrei ka seng kan ïaid beit sha khmat ïa ka jingïakhih.
U la pyntip ba ki la dep pynshai sha Assam ba kin nym khang ban wan sha Meghalaya hynrei kim dei ban leit sha jaka jngohkai pyrthei.
U la ong ba ka sorkar ka thmu ban pynmih sa 200 tylli ki kali PRIME hynrei kine kin sa kylla kum ka sem blang namar bun kiba la ïoh kim biang ka kamai ki la shah tan noh.
