Shillong, Nailur 10
Ka North Liberty Higher Secondary School ka la hap ban long kaba phikir bha halor ki rta jong ki khynnah hashwa ba kin mih na ka nongbah ban leit shim bynta ha ka 64th International Subroto Mukherjee Football Cup 2025, ka ban sa long shen ha ka nongbah Delhi.
Kane ka la wan hadien ba ka kynhun ïalehkai Under-15 boys jong ka Mawtneng U.P&SS kaba na Ri Bhoi ka la shah weng shi shi syndon na katei ka lympung hadien ba la lap ba ki la don haduh 4 ngut ki khynnah ïalehkai kiba la palat ïa ka rta ba la buh.
Haba ïakren bad u coach kane ka kynhun, u Bah Dapmon Tariang u la pynpaw ba ka skul ka la ïaleh katba lah ban pyndep ïa baroh ki jingdonkam ha kaba ïadei bad ki rta jong ki khynnah. “Ngi la pyndep ïa baroh ki jingdonkam kumba ki bor pynïaid ki la bthah ïa ngi ba ngin pyndep. Ha ka jingshisha ngi la jied da ki khynnah kiba dang biang rta.”
“Kine baroh ki shong ha ki doktor ba ki lah ban pynshisha ïa ka snem ba shisha jong ki khynnah,” u la bynrap.
Haba kylli la ka kynhun ka la long ba la pynkhreh ne em hashwa ba kan mih na ka nongbah ban leit shim bynta ha katei ka lympung, u Bah Tariang u la ong ba kum ka kynhun ka la long ba la pynkhreh bha. “Kum ka kynhun ngi la long ba la pynkhreh bha ban leit shim bynta sha nongbah Delhi namar ngi la ïoh ïa ka por kaba kylluid ban pynkhreh bad kilanmet bha.”
Kumba ka paw kane ka long ka sien kaba nyngkong eh ïa ka North Liberty kaba na West Jaiñtia Hills ban leit shim bynta ha katei ka lympung ha ka kyrdan ïalehkai Under-17 ki shynrang bad la khmih lynti ba kan lah ban ïalehkai bha bad ban pynurlong ïa ka jingjop.
Ka jingïoh rung ka North Liberty ban leit shim bynta ha katei ka lympung ka la wan urlong hadien ba ka rah ïa ka nam lahduh ha ka State Level Subroto Mukherjee Football Cup 2025 hadien ba ka la lah ban pynliem ia ka Nongjri Presbyterian SS na Ri-Bhoi da 1-0 kol.
Te kumta kane ka kynhun kan mih na ka nongbah ha ka sngi Thohdieng ban leit sha Delhi bad la khmih lynti ba kan lah ban ïalehkai bha naduh kaba sdang ha katei ka lympung bad ruh ban wanrah nam bad burom ïa ka Jylla hi baroh kawei.
