Shillong, Nailur 10
Ka Bolivia ka la pynshaïong ïa ka Brazil hadien ba la lah ban pynliem da 1-0 kol ha ka ‘playoffs’ jong ka lympung ïaknieh rung World Cup 2026, katba ka Argentina ka la mad ïa ka jingshah rem da 1-0 kol ha ka Ecuador ha ka jingïalehkai ba khatduh jong kane ka jingïaknieh.
Kane ka nam jop jong ka Bolivia ka la wan urlong lyngba ka shi kol ba la thep da u Miguel Terceros lyngba ka penalty ha ka kylla step jong kane ka jingïalehkai ha la ïing na ka bynta ban pynliem shi syndon ïa ka Brazil, kaba la rah lahduh haduh san sien ha ka World Cup ha La Paz bad ban pynlong ïa katei ka kynhun jong u Carlo Ancelotti ban hiar sha ka kyrdan basan.
Ka Bolivia kan ïadonlang ha ka ‘playoffs’ da ki ar tylli ki kynhun na ka CONCACAF bad kumjuh mar kawei na ki kynhun jong ka Africa, Asia bad Oceania, na ka bynta ban ïoh jaka tang ar tylli ki kynhun sha ka World Cup ha Canada, Mexico bad America.
Katba ka Ecuador bad ka Argentina kaba la rah nam lahduh haka World Cup, kam shym la duna ka jingkhlaiñ ha ka jingïalehkai jong ki ha Guayaquil.
U rangïalehkai ka Argentina u Nicolas Otamendi u la shah beh na madan ha ka minit kaba 31 bad ka Ecuador ka la ïoh ïa ka kabu kaba biang ban pynphai kylla lyngba ka penalty ba la shut da u Enner Valencia hashwa ban kut ka kylla step.
Hadien katto katne ka Ecuador ka la hap ban ïalehkai sa tang shiphew ngut ki rangïalehkai hadien ba u Moises Caicedo u la shah beh na madan ha ka minit kaba 50, hynrei haduh kaba kut ka la lah ban khur ïa ka jingjop da 1-0 kol bad ban wan ha ka kyrdan ba-ar.
U khlur ïalehkai ka Argentina u Lionel Messi, uba la ïalehkai khatduh ha la ïing ha ka sngi Palei, um shym la mih madan.
Wat hapdeng kane ka jingjop, ka Argentina ka la ïai bat ïa ka kyrdan ba hakhlieh bad kamai 39 poiñ bad ban tam haduh khyndai poiñ ïa ka Ecuador.
Ka Colombia ka la wan ha ka kyrdan balai hadien ba ka la jop da 6-3 kol ïa ka Venezuela ha Maturin. U Luis Suarez ula lah ban pynpaw ïa ka jingtbit ha kaba u la thep haduh saw kol ban pynlip noh ïa ka jingkyrmen jong ka Venezuela ban ïoh jaka ha ‘playoff’.
Ka Uruguay ka la wan ka kyrdan basaw hadien ka jingïakhaid khlem don ba thep kol bad ka Chile ha Santiago, katba u Matias Galarza u la lah ban thep kol na ka bynta ban pynlong ïa ka Paraguay ban jop da 1-0 kol ïa ka Peru ha Lima, na ka bynta ban don ha ka kyrdan ba hynriew.
