Jowai, Nailur 10
Ka ïingkashari District & Sessions Judge u N.A Khan ha ka 10 tarik Nailur ka la rai pynrem ïa u Dros Pakem halor ka jingdonkti ha ka kam pynïap briew kaba khlem da thmu khnang da kaba set phatok 2 snem ha ryngkat ka kuna T.5000.
Kane ka jingjia ka dei kaba la jia naduh ka 23 tarik u Naitung, 2021 ha kaba la kynnoh ba u Dros Pakem u la tied ïa la u para jong u, u Dao Pakem da ka lyngknot dieng na ki bynta jong ka khlieh ha ka shnong Mooralong kaba hap ha Jowai, West Jaiñtia Hills District.
Kane ka jingjia ka la jia ha ka por kumba 10 baje mynmiet ha kaba u Dao Pakem u la ngat ha ka jingmynsaw jur bad khlad noh ha ka sngi kaba bud katba dang pynkynriah ïa u sha Civil Hospital, Jowai.
La register ïa kane ka case ha thanad Jowai hapoh ka FIR No. 103(7)11 jong ka kyndon Section 302 IPC (murder). Ïa kane ka jingtohkit la lamkhmat da u SI E Pohchen.
Hadien ka jingbishar kaba bniah, ka ïingbishar ka la lap ba u Dros Pakem u donkti katkum ka kyndon 304 bynta II IPC na ka bynta ka jingpynïap briew kaba khlem da thmu khnang ban pynïap.
