Shillong, Nailur 10
Ka Sawmer SC ka la lah ban pynpaw ïa ka jingtbit ha ka lympung ïalehkai Shillong Premier League 2025 hadien ba ka la pynliem noh ïa ka Rangdajied United da 1-0 kol ha ka jingïakhun ka wat kaba san ha ka sngi Balang ha SSA Stadium kaba ha First Ground, Polo.
Kane ka nam jop ka la wan urlong lyngba u Khaiñkupar Ïawphniaw hadien ba u la thep ha ka minit kaba 63 na ka bynta ban jam sha ka kyrdan basan.
Ka Rangdajied ka la long ka kynhun kaba paw ha kane ka lympung, hynrei mynta ka aïom kam shym la lah ban ïalehkai bha mynta ka aïom ha kaba kam shym la lah ban thep kol ha ka sien kaba lai na ki san sien ïakhun.
Na ka bynta ka Sawmer, ka la sdang ban ïalehkai bha ha kaba sdang ha kaba ka la jop ïa ka Nongrim Hills kaba don ha ka kyrdan ba shatrai ha ka 20 tarik u Nailar, hynrei ka la mad ïa ka jingshah rem ha kiwei pat ki jingïakhun.
Ka Sawmer kam shym la duna ha ka jingthep kol, namar ba ka la thep 7 kol hashwa ïa kane ka jingïalehkai bad ka la pyrshang ban thep kol ha ka kylla step lyngba u Bickyson Kharkongor, hynrei la shah khanglad noh ha ki rangïalehkai ‘dien, katba ka bol ba la shut da u Rijied Sunn ka la leit dei na diengkol hashwa ban kut ka jingïalehkai jong ka kylla step. U nongapkol ka Rangdajied u Kerichard L Marshillong u la lah ban pyllait na ka jingshah thep ha ka minit kaba 24.
Na ka liang ka RUFC ka la jan ïoh thep kol hynrei u rangïalehkai ‘dien jong ka Sawmer u Mebanjop Warjri u la lah ban khanglad na ka jingshah thep. Nangta u Benny Khriam u rangïalehkai ka Rangdajied u la pyrshang ban thep da ka khlieh hynrei um shym la lah ban pynurlong na ka daw ka jingtbit u nongapkol ka Sawmer u Pyrshangbanbha Dkhar.
Ha ka kylla miet, ka Rangdajied ka la sdang ban ïakhun tyngeh, hynrei kam shym la lah ban thep kol. Hynrei ka Sawmer ka la ïoh ïa kabu kaba biang lyngba u Khaiñkupar ha ka minit kaba 63. Ka Rangdajied ka la ïoh ïa ka kabu kaba biang ha ka minit kaba 73, hynrei ka la shah khanglad noh ha u Pyrshangbanbha. Haduh kaba kut ka RUFC kam shym la lah ban pynurlong bad ka la mad ïa ka jingshah rem.
Lyngba kane ka jingjop ka Sawmer ka la don ha ka kyrdan basan bad kamai 6 poiñ, katba ka Rangdajied ka la hiar sha ka kyrdan ba hynñiew napdeng ki 10 tylli ki kynhun lem bad 5 poiñ.
Ka jingïalehkai ha ka sngi Palei kan long hapdeng ka Nangkiew Irat pyrshah ïa ka Laitkor ha ka minit 4:30 nohphai sngi.
