Shillong, Nailur 10
U MLA ka NPP u Limison D Sangma na Raksamgre Konstitwensi u la long uba la khreh ban sa shimti noh ïa ka shuki Deputy Speaker ba thymmai jong ka ïingdorbar thawaiñ ka jylla, ha ka ilekshon kaba la buh ban pynlong ha ka 12 tarik mynta u bnai.
Kumba ka long mynta, u Limison u la long tang ma u marwei u kyrtong uba la thep kyrteng ha ka sngi Balang na ka bynta katei ka shuki. Ïa ka jinglong kyrtong ka jong u, la tyrwa da ki Myntri Sorkar ba kynthup ïa u Marcuise N Marak bad u AT Mondal.
U Lamphang ka ïingdorbar u Thomas A Sangma u la pynthikna ba hadien ba la ïoh pdiang tang kawei ka jingtyrwa, ka jingpynlong ïa ka ilekshon kan ïaid shakhmat da ka jingthep kyrteng jong u Limison.
“Namar katkum ka jingbuh tarik, lashai kata ka 11 tarik kan dei ka sngi na ka bynta ban weng kyrteng bad lada jia ba don ba weng kyrteng, kumta ngi hap ban don biang ïa ka jingpynbna bad ban shna pynbeit biang ïa ka por na ka bynta ka ilekshon deputy speaker. Haduh mynta, ngi dang ïoh tang kawei ka jingtyrwa,” u la ong haba kren sha ki lad pathai khubor.
Ka jingpynlong ïa kane ka ilekshon na ka bynta ban jied ïa u deputy speaker ba thymmai ka la wan hadien ba u MLA ba la rangbah ka NPP na Resubelpara Konstitwensi u Timothy D Shira u la hiar noh na ka shuki, da kaba kdew ba ka dei ka jingbthah na ki nongïalam ba halor jong ka seng.
