France, Nailur:
U President ka France, U Emmanuel Macron ha ka Sngi Ba-ar, u la thung ïa u Sebastien Lecornu, u Myntri kam poh-ïing ka ri, kum u Myntri Rangbahduh ba thymmai jong ka ri, uba la kylla long u Myntri Rangbahduh ba saw jong katei ka ri bad tang hapoh jong ka shi snem jong ka jingjied nongialam katei ka ri.
U Lecornu, uba la don 39 snem ka rta, u dei u Myntri ka tnat iada ri uba dang khynnah tam ha ka histori jong ka France bad u dei u nongtei ïa ka jingkhlaiñ jong ka tnat shipai haduh jong u snem 2030, kaba la kylla dur noh namar jong ka thma ka Russia bad ka Ukraine.
La ong ba u nongpyrshah sorkar barim uba la ïasoh bad ka jingïakhih jong u Macron ha u snem 2017, u la bat ïa ki kam ha ka Sorkar Pdeng, ki jaka ba shabar ri bad ha ka por jong ka jingïakren kaba khraw jong u Macron, ha kaba u la ïarap ban pyndeit-thah ïa ka jingbitar ki paidbah da ka jingïakren. U la tyrwa ruh ïa ki jingïakren halor ka jingsynshar hi ha ka por ba don ka jingkulmar ha Guadeloupe ha u snem 2021.
Ka jingkiew jong u, ka pyni ïa ka jinglong jong u Macron ban ai khusnam ïa ka jinglong ba ïai neh hynrei ruh ïa ka jingdonkam ban bteng namar ba ki jingpynpaw pyrthei ba ju jia man ka por ki la pynhap ïa ki nongmihkhmat kiba mynshuwa jong u bad ki la iehnoh ïa ka France ha ka jingma.
Ki nongthaw aiñ, ki la pynhap noh ïa u Francois Bayrou, u nongmihkhmat ba hashwa jong u Lecornu bad ïa ka sorkar jong u, ha ka jingthep vote ai jingshaniah ha ka sngi Nyngkong, kaba dei ka jingeh kaba thymmai na ka bynta ka ïoh ka kot kaba ar ha Europe.
U Bayrou u la ïalehkai ba ki nongthaw aiñ kin kyrshan ïa ka jingmut jong u ba ka France ka dei ban pynduna ïa ka jingpynlut paidbah ban tehlakam ïa ki ram kiba heh jong ka. Ha ka jaka kata, ki la bat ïa ka vote ban ïaleh pyrshah ïa une u centrist ba 74 snem ka rta uba la shah thung da u Macron ha u Nohprah ba la dep.
Ka jingkhlad noh jong ka sorkar rit paid jong u Bayrou ka pynbna ïa ka jingbym thikna kaba thymmai bad ka jingma jong ka jingsahkut aiñ kaba slem na ka bynta ka France katba ka dang ïakhun pyrshah ïa ki jingeh kiba jur, kynthup ïa ki jingeh ha ka mang tyngka bad, ha ka pyrthei, ki thma ha Ukraine bad Gaza bad ka jingkylla jong ki jingthmu ba kongsan jong u president jong ka US Donald Trump.
Ka jingshna ïa ka mang tyngka kan long ka mat ba kongsan tam na ka bynta u Lecornu, bad kumba ju long u myntri rangbahduh ba thymmai un thaw ïa ka sorkar ba thymmai shwa ban iakren ïa ka jingpynlut pisa jong ka ri ha Parliament. Hynrei u Macron u la bthah ïa u Lecornu ban ïamir jingmut shwa bad baroh ki seng saiñpyrthei kiba don ha Parliament ban pyrshang ban ïa mynjur halor ka mang tyngka shwa ban lum lang ïa ka kynhun jong u.
“Ka jingleh jong u myntri rangbahduh kan long kaba la ïalam da ka jingïada ïa ka jinglaitluid jong ngi bad ka bor jong ngi, kaba shakri ïa ki nong France bad ka jingshong shngaiñ ha ka saiñ hima sima bad ka tnat treikam na ka bynta ka jingïatylli jong ka ri jong ngi,” ong u Macron ha ka kyrwoh.
