Shillong, Nailur 11
Uwei u dkhot jong ka Seng Samla Shnong Mawryngkneng (SSSM) bad ki bahaïing jong u, la kynnoh ba ki la shah byrngem ha uwei u briew halor ka kam khynra kyiad.
Katkum ka khubor kaba la ïoh na ki pulit la ong ba u Khrawkupar Lyngdoh Nonglait, u Moonlight War lem bad kiwei ki ar ngut jong ka shnong Mawryngkneng ha East Khasi Hills ki la ai lang ïa ka jingujor sha ki pulit pyrshah ïa uwei u briew ba kyrteng u Kitbok Kharsati, da kaba kynnoh ba u la byrngem ban dung tari ïa uwei u dkhot jong ka Seng Samla Shnong Mawryngkneng bad ïa ki bahaïing jong u.
Kane ka jingujor pyrshah ïa utei u briew uba la kynnoh ba u la byrngem ka long halor ka kam jong ka jingkhynra ïa ka jaka shna kyiad jong u, kaba don ha Mawmang, East Khasi Hills ha ka 3 tarik mynta u bnai.
