Shillong, Nailur 11
U Myntri Rangbah ka Jylla, u Conrad K. Sangma ha ka Sngi Balang u la pyntip ba ha kine ki 5 snem ba la dep, ka Sorkar ka la thung haduh 500 ngut ki doktor, ha kaba ki don ruh katto-katne kiba dang don hapdeng ka jingshah hikai ban khmih ïa ka jingduna doktor ha ki Primary Health Centre (PHC) bad Community Health Centre (CHC).
Kane ka sienjam ka la wanrah ïa ka jingmanbha kaba khraw ha ka liang ka koit ka khiah, la ong u Sangma ha Ïingdorbar haba jubab ïa ka ‘Cut Motion’.
Ka Sorkar ka la thaw ruh ïa ka ‘Recruitment Board’ na bynta ka tnad ka koit ka khiah, kaba la long ka rai kaba kongsan ban khmih ïa ka jingduna ki nongtrei ka koit ka khiah, u la bynrap.
Ha kawei ka liang, u Myntri Rangbah u la ong ba wat hapdeng kane ka jingkiew, ki jingeh ki dang don, bad dang don shuh-shuh ki kam kiba hap ban leh.
Shuh shuh u la pynthikna ba ka jinglong-jingman ka la kham bha shikatdei ban ïa kaba mynshuwa bad pynpaw ka jingsngewskhem ba kan nang ïai bteng ban kiew ha ki sngi ban wan.
