Shillong, Nailur 11
Ki Nongialam Ka Synjuk ki nongdie jaiñ Khasi Market ki la byrngem ban leit tur sha Secretariat ne sha ophis ka Municipal lada kim lah ban pyndep ban shna ïa ka jingtei kaba don ha Motphran hapoh u bnai Kyllalyngkot 2026.
Ïa kane la pynpaw da ki nongdie jaiñ kiba la sngewbitar namar ka jingpynslem ka Sorkar lyngba ka tnat Municipal ban pyndep ïa ka jingtei kaba saw mala ha Motphran tang hapoh 10 bnai hynrei mynta la 2 snem kim pat ïohi dak eiei ban pynïeng ïa ka jingtei.
Haba kren bad u Nongsaiñ Hima ka Kong Sheba Nongbet kaba dei ka President bad ka Kong Larisuk Ranee kaba dei ka Secretary ki la ïathuh ba ha ka por ba ki wan ban ïakynduh ïa u CEO, u la ïathuh ba ka tnat Municipal ka ïatreilang bad ka Smart City kumta ka kham shim por ban pyndep namar ba hap ban wan jurip biang ki heh ba dei peit na Kolkata.
Ka Kong Larisuk Ranee ka la ïathuh ba ka jingpyntrei ïa katei ka ïew ka suki bha naduh ba ki sdang ban mih na katei ka jaka haduh mynta bad naduh ba na ka liang jong ki, ki la leit ban mih sha ka tnat Municipal, ki sa sdang ban kham pynsted mynta la shi bnai bad ki la kham bun kiba trei.
Ka la ong namar haba ki ïohi ïa ka jingtrei ki don tang kumba 5 lane 6 ngut ki nongtrei ïa ka jingtei ïa ka mala kaba haduh saw mala.
Shuh shuh ka la ong ba ki nongdie jaiñ ki la kohnguh ïa ka Sorkar ban mih na Motphran ban leit shong shajrong jaka ïeng kali kiba na Ribhoi hynrei mynta la ïaid ar snem kam pat pyni dak eiei ba kin pyndep ban shna ïa ki dukan ba thymmai.
Ka la ong ba ka Sorkar ka ïohi ba ki nongdie jaiñ ki dei tang ki riew kynthei takadaw ka leh sting hynrei kam tip ba ki kynthei ki don la ka jong ka bor.
Ka la ïathuh ruh ba u CEO u la kular ban pyndep noh ïa katei ka jingtei ba saw mala ha u bnai Kyllalyngkot jong u snem 2026.
Na ka liang ka Synjuk ka la byrngem ba lada kata ka jingkular u CEO kam urlong ban pyndep ha u Kyllalyngkot 2026, kin mih paidbah na katei ka jaka bad kin pynlong syndon da ki jingïakhih bad long katba long jia katba jia lada tur sha Secretariat ne sha Municipal.
