Shillong, Nailur 11
U Bah Titosstarwell Chyne u ba long u General Secretary ka United Democratic Party u la ïathuh ba ka party ka leit buh jingthoh ha u Myntri Rangbah haba ïadei bad ka jingwanrung ki briew ba nabar khamtam hadien ba ka sorkar Assam ka la kyndang ïa ki briew bym dei ki nong India.
Ka party ka la ban jur ïa ka Sorkar Jylla ha kaba ïadei ka jingdawa Inner Line Permit (ILP) kumba ka ïingdorbar thaw aiñ ka la dep phah ïa ka Resolution. Ka sorkar Jylla ka dei ban ïai-dawa na ka sorkar pdeng, ha ka ba ïadei ban pyntreikam noh ïa ka ILP hapoh ka Jylla Meghalaya.
Shuh-shuh u la ong, ka Meghalaya Residents Safety and Security Act (MRSSA) ka khlem lah ban treikam bha ha ka jylla bad katkum ka jingkren u myntri rangbah, ka sorkar kan thaw da kawei pat ka aiñ ka ban tehlakam ïa ka jingwan rung ki briew ba nabar.
U la ong, ka UDP ka kyntu ïa ka sorkar Jylla, lada ka long ban thaw da kawei ka aiñ ruh ka por ka la dawa ban thaw noh kham kloi namar ka don ka jingdawa na ki paidbah, ka party ruh ka sngewdei ba kan don ka aiñ kaba khlaiñ ka ban peitngor ïa ka jingwan rung ki briew ba nabar.
“Ka Meghalaya ka la don ïa ka Directorate of Infiltration, ka UDP ka pynkynmaw ïa u Myntri rangbah ka jylla, ba dei ban pynkhlaiñ ïa ki khyrdop ban peit pyrman ïa ka jingwan rung jong ki briew ba na bar”, la ong u Bah Titos.
U Bah Titos u la kyntu ïa ka sorkar ba kan shimkhia halor ka pyntreikam ïa ka ILP ha Meghalaya, ym ban shu shimkhia tang ha ka por ba don jingïakhih, namar ka jingdawa ILP ka dei ka jingdawa ka ba la neh slem bha bad ka sorkar ka dei ban don ka jingshimkhia ban pynurlong noh ïa ka jingkwah ki paidbah.
