Shillong, Nailur 11
Ka Meghalaya ka la ïoh pdiang haduh T.405.64 klur hapoh ka Jal Jeevan Mission (JJM) jong u snem 2024-2025.
Ïa kane ka pisa la pyllait da ka Ministry jong ka Jal Shakti, Department of Drinking Water and Sanitation, la ïathuh u Myntri ba khmih ïa ka tnat Public Health Engineering u Marcuise N Marak haba jubab halor ka jingkylli ba la wanrah hapoh ka ïingdorbar ha ka sngi Palei.
U la pyntip ba ka Ministry haduh mynta kam pat pyllait ïa ka pisa na ka bynta u snem 2025-2026.
U Myntri u la ong ruh ba ki bill kiba dang sah kata haduh ka 31 tarik Nailar, 2025 kaba dei ban siew sha baroh ki kontraktor na ka bynta ki kam ba la pyndep, ym pat ïoh pdiang na ka Sorkar Pdeng kaba la kot sha ka T.695,01 klur.
