Jowai, Nailur 11
Ka Mulang Ïalong bad ka Risingsun Mukhla ki la khur jingjop ha ka lympung ïalehkai 2nd Division Football Tournament na ka bynta ka 8th Debo Shullai Memorial Trophy ba la pynïaid da ka West Jaiñtia District Sports Association (WJDSA) ha ka sngi Palei ha Kiang Nangbah Stadium, Jowai.
Ha ka jingïakhun kaba nyngkong, ka Mulang Ïalong ka la pynjem khnap ïa ka NSA da 7-0 kol. U Samehipaia Ryngki u la khyrwit da ka hat-trick hadien ba u la ïoh ban thep ha ka minit kaba 49, 63 & 79, katba ïa kiwei pat la bynrap da u Nidaroi Mulieh (8), Richard Dhar (13), Heimon Dkhar (53) bad u Tympang Tangliang (59).
Ha kawei pat ka jingïakhun kaba ar, ka Risingsun Mukhla ka la jop da 2-0 kol ïa ka Caroline Colony. Kane ka la wan urlong lyngba ki kol ba la thep da u Alford Lyngdoh ha ka minit kaba 2 bad u Stopper Bang (7).
Haba phai sha kawei pat ka jingïalehkai ka Iawmulong Nartiang bad ka Khliehmynkrem ki la kut ha ka jingïakhaid hadien ba kim shym la lah ban thep kol haduh kaba kut ka jingïalehkai.
