Shillong, Nailur 11
U Symbud Myntri Rangbah Bah Prestone Tynsong ha ka sngi Palei u la ai jingkheiñ halor ki surok Pradhan Mantri Gram Sadak Yojana (PMGSY) ba la pyntrei ha Meghalaya.
Hapoh ka PMGSY-I, na ka 1079 ki surok, 1063 ki dei kiba la dep pyntrei bad 10 tylli ki dei kiba dang sah bad kiba dang ïaid shakhmat ka jingpyntrei.
Hapoh ka PMGSY-II, na ki 94 tylli ki surok, 90 tylli ki dei kiba la dep pyntrei. Tang lai tylli ki dang sah ban pyndep.
Hapoh ka PMGSY-III, na ki 141 tylli ki surok, 29 tylli kila dep pyntrei. Ki don sa 26 tylli kiba dang ïaid bad 86 tylli ki ban dang sdang namar ki dei kiba dang shu ai pyntrei ha u Rymphang-Jymmang 2025, ong u Bah Prestone ha ka jubab ba la wanrah hapoh ka ïingdorbar.
Nalor kane, kawei ka surok bad 8 tylli ki jingkieng ki dang ïaid ha ka jingkhot tender, u la bynrap.
U pyntip ba ha Mawlai, ka don tang kawei ka surok ba dang pyntrei, ka MRL05-Mawlai sha Lummawsiang sha Mawsiatkhnam (L-10.00Km), kaba la bei hapoh ka PMGSY-III (2022-23), kaba la dep mynta la 85%.
