Shillong, Nailur 11
Ka Sonam Raghuvanshi kaba la kynnoh donkti ha ka kam pynïap ïa la u kurim u Raja Raghuvan-shi, ka lah ban pan jamin lashai ka sngi ka 12 tarik na ka ïingkashari kaba don ha Sohra.
Katkum ka tyllong khubor kaba la ïoh la ong ba ka daw ba ka Sonam ka lah ban pan jamin na ka ïingkashari na Sohra ba ka charge-sheet ne ka jingmudui ba ai ki pulit sha ka ïingkashari ka long ka bym pat biang.
Lah ban pynkynmaw ba ki pulit ka East Khasi Hills ha ka 5 tarik u Nailur ki la ‘Charge-sheet’ lane rah ïa ka jingmudui sha ïingbishar ha Sohra pyrshah ïa ka Sonam Raghu-vanshi ryngkat bad 4 ngut kiba donkti ha ka ban pynïap ïa u Raja Raghuvanshi hajan ka Wei Sawdong, Sohra. Kane ka jingmudui ka don haduh 790 sla.
Lah ruh ban pynkynmaw ba ha ka 21 tarik u Jymmang, 2025, u Raja Raghuvanshi bad ka kurim jong u, ka Sonam Raghuvanshi kiba na Indore, Madhya Pradesh ki la wan poi sha Shillong bad ki la leit ‘Honeymoon’ sha Sohra.
Katba ha ka 26 tarik u Jymmang, 2025, la pyntip ba kitei ki shi kurim ki la jah rngai na Sohra bad kumta ki kynhun pulit ki la pynlong ïa ka jingwad ïa ki bad hadien katto-katne sngi, ki pulit ka Sohra, SOT, NDRF, SDRF, ki kynhun ‘Trekking’ bad ki nongshong shnong ka thaiñ, ki la lap ïa ka metïap jong u Raja Raghuvanshi ha ka 02 tarik Jylliew, 2025, na ka riat kaba don ha Arliang Riat Kunongrim, Umblai hajan ka Wei Sawdong.
Ïa katei ka jingjia, la pynrung mukotduma ha thanad Sohra.
Ha ka por ba pynlong ïa ka jingwad ïa ka Sonam Raghuvanshi, la thaw ïa ka Special Investigation Team (SIT) kaba kynthup ïa u SP (City), EKH, u Bah Herbert Kharkongor, MPS, u Bipul Das, MPS, Dy. Superintendent of Police (Crime), u Simseng A. Sangma, MPS, Dy. Superintendent of Police (Ops), Bah Kyrmen Shabong, MPS, Dy. Superintendent of Police (City), S.I., Bah Anthony Khongsit, I/O bad 2 ngut ki Sub-Inspector jong ka Special Cell.
Tang hapoh 7 sngi jong ka jingtohkit, ki pulit ki la lap dien ïa ki 5 ngut kiba shah kynnoh donkti kynthup ïa ka Sonam Raghuvanshi kiba donkti ha ka ban pynïap ïa u Raja Raghuvanshi, sha Madhya Pradesh bad Uttar Pradesh.
Hadien ba la pynlong ïa ka jingtohkit kaba bniah, la shem ba ka Sonam Raghuvanshi ka don jingïadei bad u Raj Kushwaha bad ka la don ruh ka jingïasylla kam sniew na ka liang u Raj Kushwaha ryngkat ka Sonam lem bad 3 ngut kiwei pat ban pynïap ïa u Raja da kaba ai daw halor ka ‘Honeymoon’ sha Sohra.
Katba dang ïaid ka jingtohkit, ki pulit ki la kem ruh sa ïa 3 ngut kiwei pat kiba la shah kynnoh donkti ba kynthup ïa u Lokendra Tomar, Balla Ahirwar bad u Shilom James na Gwalior, Shadora bad Dewas halor ka jingpynduh-pyndam ïa ki sabut.
Halor kane, ki pulit ki la dep ban aiti ïa ka ‘Charge Sheet’ kaba 790 sla ryngkat bad ki sabut pyrshah ïa kiba shah kem bad shah kynnoh donkti sha ka ïingkashari Judicial Magistrate 1st Class, Sohra Sub- Division Court.
Ki kyndon aiñ kiba la pynngat ïa ka Sonam Raghuvanshi, Raj Singh Kushwaha, Vishal Singh Chauhan, Aakash Singh Rajput bad u Anand Kurmi ki long hapoh jong ka 103 (1)/238 (a)/61(2) jong ka Bharatiya Nyaya Sanhita, 2023.
