Jowai, Nailur 11
Ki bor pynïaid jong ka North Liberty Higher Secondary School Mookyrdup, Jowai lyngba ka ‘Prayer Meeting’ ha ka sngi Palei ki la lumlang ïa ka kynhun ki rangïalehkai Under-17 ki ban mihkhmat ïa ka Jylla sha ka 64th International Subroto Mukherjee Football Cup 2025, ka ban sa long shen ha ka nongbah Delhi.
Kane ka ‘Prayer Meeting’ ka long ban kitbok kitrwiang bad ai mynsiem ïa ka kynhun ïalehkai shwa ba kan mih napoh ka District bad ban leit sha ka nongbah Delhi ha ka sngi Thohdieng.
La wan ban ai mynsiem ïa ki khynnah da u Assistant Director ka tnat ïalehkai bad uba long u District Sports Officer (DSO) ka West Jaiñtia Hills District u Bah Khroobok Passah, u Waheh Shnong Mookyrdup Bah Pyrkhat Shylla, u Principal Bah B. Richard Uriah ha ka jingdonlang ki kmie ki kpa jong ki khynnah.
U Bah Khroobok ha ka jingkren jong u, u la pynpaw ïa ka jingsngewkmen ba ki khynnah ka North Liberty ki ïoh ka lad ban mihkhmat ïa ka Jylla bad aikhublei ruh ïa ki Coach bad kyrpang eh ïa u Principal u Bah B. Richard Uriah u bym shym la kynran dien bad ha ka jingpyrshang ha ka sien khyndai ka North Liberty ka poi shisha sha ka thong bad ban mihkhmat ïa ka Jylla sha katei ka lympung kaba heh duh jong ka Subroto Cup.
U Bah Passah ula ong ka North Liberty ka bna nam ym tang hapoh ka District, ka Jylla hynrei wat shaduh ka National Level, namar mynshem snem la buh ïa ki dur jong ka North Liberty Higher Secondary School ha ka Souvenir jong ka Subroto Cup watla kam ïoh lad ban leit sha Delhi.
Haba kyntu bad ai mynsiem ïa ki 16 ngut ki rangïalehkai ba kin ïakhun tyngeh ban poi sha ka thong, u Bah Khroo ula ong, “Lada kane ka kynhun kan wanphai ïing da ka jingjop kan dei ka kynhun kaba nyngkong eh napoh ka Rilum Jaiñtia ban rah ïa ka Subroto Cup’.
“Ka jingïohlad ban mihkhmat ha kum kane ka lympung ïalehkai ka ri, ym dei tang ban rah nam rah burom ïa ka District ka jylla, hynrei ka dei u mawjam jong ka jingim jong phi ha ka kam ïalehkai phutbol,” la bynrap u Bah Passah da kaba ai nuksa ruh ïa ki rangïalehkai ba paw ka ri kum u Bhaichung Bhutia, u Sunil Chettri ki sdang na ka Subroto Cup bad shah jied pat ha ki klob ba paw ka ri.
“Kumta long kiba trei shitom, ïakhun tyngeh, phi don mynta ha ka lynti kaba biang bad man u mawmer ba phi jam ka long ka jingsarong bad lynti ïa phi nangne shakhmat,” la ong u Bah Passah bad u la kyntu ruh ban long ki khynnah kiba ryntih (discipline), namar ka long kaba kongsan haba ïakhun ha madan kum ka kynhun baroh kawei.
‘Nga kyrmen skhem ba ki rangïalehkai kin ïalehkai bha bad ka kynhun kan rah ïa ka nam jop”, la ong u DSO. Ïa ka jingïalang la pynïaid da ka nonghikai ka Kong Sakapaia Plain, bad la ïoh ka jingduwai na u Pastor Benison Suchiang kumjuh na u Bah Risingson Kharrngi.
Hadien ka jingïalang la sam ïa ki jersey bad ki tracksuit ba la ïoh lyngba ka tnad ïalehkai bad ki pla ba ai sngewbha da ka Mookyrdup Youth Walfare Organisation.
Shwa kane ka kynhun ka la ïoh ban pynkhreh lyngba ka jingkilanmet kaba 18 sngi ha SAI Training Centre, Shillong bad ïa kane ka kynhun yn ïalam da ki Coach bad Manager kynthup ïa u Bah Dapmon Tariang, Bah Damehi Kyndiah bad Bah Joshwa Pohdweng. Kane ka kynhun kan mih napoh ka District ha ka step jong ka 12 tarik Nailur 2025.
