Shillong, Nailur 11
Ka Kynhun Myntri ka la pdiang ïa ka kaiphod jong ka Independent Inquiry Committee (IIC) ba la thung ban tohkit halor ka jingkynnoh, ba ïadei bad ka jingthied tiar, ka Aggregate Technical & Commercial (AT&C) loses, bad ka rukom thungkam ka Meghalaya Energy Corporation Limited (MeECL) lem bad ki lai tylli ki shnat jong ka.
Ka Independent Inquiry Committee ka la ai ïa ki katto katne ki jingai jingmut ban pynjanai ïa ka jingtreikam jong ka MeECL bad hapoh ki shnat treikam jong ka.
“Hadien ba la ïohpdiang ïa kane ka kaiphod, ka Kynhun Myntri ka la bthah ïa ka Tnad Bording ban pynthikna ba la shim ïa baroh ki sienjam ban pyntreikam ïa ki jingai jingmut bapher bapher ba la ai da ka Inquiry Committee” ong u Myntri Rangbah ka Jylla u Conrad K Sangma haba kren sha ki lad pathai khubor hadien ba la kut ka jingïalang Kynhun Myntri ha ka sngi Palei.
U Myntri Rangbah u la pynthikna ruh ba ïa ka kaiphod jong ka Inquiry Committee yn sa pyllait paidbah da kaba buh hapoh ka ‘website’ jong ka Sorkar ha kine ki khyndiat sngi ban wan, ka ban ailad ïa ki nongshong shnong ban ïohi ïa ki jingshem bad ki jingai jingmut.
