Guwahati, Nailur:
U Myntri Rangbah ka jylla Assam u Himanta Biswa Sarma u la bishar bniah ïa ki jingpynkhreh na ka bynta ka jingwan jong u Myntri Rangbahduh ka ri u Narendra Modi sha kane ka jylla kaba lah ban long ar sngi naduh ka 13 tarik u Nailur, da kaba pynthikna ba ka Assam ka long kaba la khreh ban ai ka jingpdiang sngewbha kaba khraw.
U Sarma u la ong ba u la pynlong ïa ki jingïalang bad ki nongshim bynta ban peit ïa ki jingpynbeit shwa ban leit jngoh. La khmih lynti ba u Myntri Rangbahduh ka ri un ïashim bynta ha ka jingrakhe shispah snem kha jong u Bharat Ratna Dr Bhupen Hazarika bad un pyllait ruh ïa ka pisa sah kynmaw kaba T.100 kum ka jingburom ïa u riew pawkhmat jong ka sur jingrwai.
Ha ka 14 tarik u Nailur, u Modi, u lah ban leit sha Mangaldoi kaba don ha Darrang distrik, ban plie ïa ka Guwahati Ring Road, kaba dei ka jingkieng Brahmaputra, kaba pynïasoh ïa ka Kuruwa bad Narengi, bad ban plie ïa u maw nongrim jong ka Mangaldoi Medical College Hospital. La khmih lynti ruh ba un pynkyntang ïa kawei ka karkhana bio-ethanol kaba shongdor T.4,200 klur ha Numaligarh Refinery Limited (NRL) ha Golaghat distrik.
Ha kajuh ka por, ha Mizoram, u K Sapdanga, u Myntri ka tnat ki kam pohïing u la pynïaid ïa ka jingïalang bishar bniah bahakhliehduh halor ka jingpynkhreh na ka bynta ka jingwan jong u Modi ban plie ïa ka projek lynti rel thymmai jong ka Bairabi-Sairang ha ka 13 tarik Nailur.
U Sapdanga u la ong ba kane ka projek kan long ka mawjam na ka bynta ka Mizoram da kaba pynjanai ïa ka jingïadei jong ka bad kiwei pat ki bynta jong ka ri. La pynkhlaiñ shuh shuh ïa ki lad jingïada ha ka kad liengsuiñ Lengpui, ha kad rel Sairang, ha ka jaka ïaid liengsuiñ ha Thuampui bad ha madan Aizawl’s Lammual, ha kaba yn pynlong ïa ka jingïalang ba kongsan.
Ki heh sorkar ki la bishar bniah ruh ïa ka jingpynïaid ïa ka leit ka wan, ka jaka sah, ki kyndon pdiang sngewbha, bad ki prokram kolshor. U Chief Secretary u Khilli Ram Meena ryngkat ki ophisar ba rangbah na ki tnad treikam jong ka jylla bad ka Northeast Frontier Railways ki la wan ban ïashim bynta ha kane ka jingïalang.
Kane ka lynti rel kaba jrong 51.38 km kan pynïasoh ïa ka nongbah Aizawl jong ka Mizoram bad ka Silchar jong ka Assam, kaba pynïasoh ïa kane ka jylla ha ka map lynti rel jong ka India. Kane ka projek ka don 48 tylli ki lynti krem, 55 tylli ki jingkieng heh bad 87 tylli ki jingkieng rit, kynthup ïa ka jingkieng 144, kaba la pynpaw ba ka dei ka jingkieng rel ba pynsdien kaba jrong tam ha ka ri kaba jrong 104 meter.
