Shillong, Nailur 11
Ka Jylla Meghalaya ka la pynkhreh ban pynmih khajna shuh shuh kaba T.90 klur hadien ba ka sorkar ka la mynjur ïa ka Meghalaya Excise Amendment Rules 2025.
Ka jingpynkylla ka kynthup ïa ka jingpynkylla kyrdan biang ïa ki jait jingdih IMFL (Indian Made Foreign Liquor), ka jingpynrung kyrdan ïa ki jait jingdih ba dih paidbah, ka jingpynkylla ïa ka khajna ïa ka ‘beer’, bad ka jingpynkylla ïa ki katto katne ki kyndon.
Haba kren sha ki nongthoh khubor hadien ka jingialang ka kynhun Myntri, u Conrad K Sangma u la ong ba ïa ki jait kyiad IMFL (Indian Made Foreign Liquor) yn sa pynkylla biang ban pynthikna ïa ka dor kaba biang.
Yn pynmih ïa ka kyrdan thymmai jong ka ‘brand’ ka ba ïa dih paidbah ban ai kham bun ki lad ban jied ïa ki nongthied.
Ïa ka khajna jong ki ‘beer’ ruh yn sa pynkylla ban pynlong ïa ka dor jong ki ‘beer’ ba kham biang.
Ki katto katne ki kyndon ba yn pynkylla kiba kynthup ïa ka kyndon 44(12), ka kyndon 37(2)(1)(B), ka kyndon 71(a), ka kyndon 273, bad ka kyndon 274.
“Kumta, kane ka dei ka sienjam ban pynthikna ba ka jingbuh dor kan long kaba ïakhun bad ngi khmih lynti ba ryngkat bad kane ngin sa ïohi ïa ka jingnang kiew ha ka jingïadih ïa kaba ngi khmih lynti ba kan wanrah ïa ka jingkiew ha ka khajna, ka jingkhmih lynti jong ngi ban kiew ha ka khajna namar kine ki jingpynkylla kiba ngi dang leh la antad ba kan long T.90 klur,” la ong u Conrad.
