Shillong, Nailur 11
Ka Khasi Authors’ Society ha ka jingrakhe ïa ‘ka sngi ka thoh ka pule’ ka la pynlong ïa ka jingïamir jingtip halor ka phang ‘u synñiang ki lad pathai khubor sha ka ktien Khasi’ ha ka 11 tarik Nailur ha Shillong Com-merce College.
U Bah Shemborlang Rynjah, CEM ka Khasi Hills Autonomous District Council (KHADC) u la long u kongsan bad ka Kong Melisa Kharpuri ka symbud kongsan ryngkat ka jingïadonlang u Dr. DRL Nonglait President ka KAS, kiwei pat ki riew rangbah bad ki khynnah pule.
Ban pynshlur bad ai mynsiem shuh-shuh ïa ki samla pule, ka KAS ka la pynkup burom ruh ïa ki samla pule ba ïoh heh mark duh ha ka sobjek Khasi ha ki kyrdan bapher bapher.
U CEM u la shim ïa ka bynta ban pyllait paidbah ïa ka kot ba la ai kyrteng ‘Ka Sorkar Jylla Meghalaya’ ba la thoh da u Bah K.W Nongrum, ka kot ‘Tang Maphi, Namar Jong Nga’, ‘Ki Khana Tang U Hynñiewtrep’ bad kiwei pat ki kot ba la thoh da ki dkhot ka KAS.
U Dr. DRL Nonglait haba kren maitphang u la ong, ka KAS mynta ka dang pynbit pynbiang ban pynmih ïa ka dikshonari baheh kaba don ka jingpynbeit ïa ki rukom kynnoh Khasi bad ïa kane la bei tyngka da ka Directorate of Arts & Culture ka sorkar Jylla kumjuh ruh ka District Council.
U CEM haba kren ha ka jingïalang u la ong, um ju sngewtynnad ban beiñ ne ban ïaroh, hynrei kaba la pynlong ïa u ban kren kumne ka dei halor ka phang ”U synñiang ki lad pathai khubor sha ka ktien Khasi’ da kaba u la ong, donkam ban ai ka jinghikai ban pyntbit ïa ka jingpathai khubor la ka dei ha kano kano ka bynta, ban ïoh ïa ki kyntien kiba kit jingmut, kaba lah ban pynktik jingmut ïa ki paidbah bad pynlong ban wad jingtip ïa ka jingmut ki kyntien, kane kan ïarap ban pynproh bad pynïar jingtip ïa kiba pule haba ïadei ha ka thoh ka tar Khasi.
“Wat kheiñ ba ka sobjek Khasi ka dei kaba suk, ki don ki khynnah pule kiba shim ïa ka sobjek Khasi kiba ïoh tang 4 mark ha ka por ba thoh eksam,” u la ong.
U CEM u la ong ka jingïaleh ban ïoh pynrung ïa ka ktien Khasi hapoh ka khyrnit ba phra ka riti synshar ka ri India kam dei ka kam ba hap shimkhia tang ka KAS, hynrei ka dei ka bynta ba hap ban shimkhia lang baroh ban pyni ka jingïatylli sha ka sorkar pdeng.
“Lada ngi ieh ïa kane ka jingdawa tang ha ka tyrpeng ka KAS ka long kaba jwat eh ban ïoh jingithuh ïa ka ktien Khasi kum ka ktien sorkar, namar kata ka donkam ka jingïasnohktilang jong baroh,” la ong u CEM.
