Jowai, Nailur 11
Ka ïingkashari jong ka P. Syngkon Special Judge, POCSO, West Jaiñtia Hills District, Jowai ha ka 8 tarik Nailur kala rai pynrem ïa u Juh Lhuid katkum ka kyndon 7 jong ka aiñ POCSO, kaba lah ban pynshitom katkum ka kyndon 8 jong ka aiñ POCSO, 2012.
Kane ka mukotduma ka mih na ka FIR kaba la ujor ha ka 16.08.2018 kaba la pynpaw ba ha ka por kumba 6:30 janmiet eiei uwei u briew u bym lah ban tip u la thmu ban leh beijot ïa lai ngut ki khynnah kynthei.
Une u briew uba shah kynnoh u la ïoh ban phet krad, katba ïa ka kali kaba u la pyndonkam ryngkat bad ki paralok jong u, la bat bad aiti sha ki pulit.
Ïa kane ka case la register hapoh thanad Jowai katkum ka Case No. 196(8)2018 U/S 9 (m)/ 10/16/17 jong ka POCSO Act bad la tohkit bad Charge Sheet da ka WP SI. I Kharpran bad la lap ba u briew uba donkti u dei u Juh Lhuid.
Hadien ka jingbishar kaba bniah, ka ïingkashari ka la rai pynrem ïa utei u Juh Lhuid da kaba set phatok 3 snem ryngkat ka kuna kaba T.5,000/- (San Hajar).
