New Delhi, Nailur:
U Charlie Kirk, uba dei u nongïakhih na ka liang ka diang bad uba long u nongïarap ba jan eh jong u Donald Trump, u President ka US, u la shah siat ïap katba u dang ai jingkren ha ka Utah University, ha ka Sngi Ba-ar, ha ka sngi ba kyrpang jong katei ka skulbah.
Utei u nongkren u la ong ba ka jingbun ki paidbah nong India ha US, ka la ktah ia ka jinglong- jingman jong ki paidbah nong US bad u la ong ba ka America ka la dap briew lypa bad ka la dei ka por ba kan hap ban pynbit- pynbiang noh shuwa tang ia ki paidbah nongshong shnong jongka, ym ban shu ailad ia kiba na bar ba kin wan rung bad pynbun paid shuh- shuh kumba long mynta.
“Ka America kam donkam shuh ïa ki visa na ka bynta ki briew na India. Lehse ym don kano kano ka rukom wan buhai shnong katkum ka aiñ kaba la pynkynriah ïa ki nongtrei America kum kito kiba na India. Ka la biang mynta. Ngi la dap. Kaba kongsan, ka long ba ngin buh nyngkong ïa la ki jong ki briew,” u la thoh ha ka rynsan X (Twitter) ha ka 2 tarik u Nailur.
Kane ka jingthoh jong u Kirk ka don ka jingiadei bad ka jingkren ba la thoh bad pyllait ha katei hi ka rynsan X ba la thoh da kawei ka nongthoh khubor jong ka Fox News, ka Laura Ingraham, ha kaba ka la ai jingmut ba kano- kano ka jingïateh khaïi pateng bad ka India, kan donkam ïa ka US ban ailad shuh- shuh ïa ki Visa.
