Shillong, Nailur 11
U Nongïalam ka Liang Pyrshah u Mukul Sangma u la pynpaw ïa ka jingsngewsih halor ka jingbym shah khot ha ka jingplie ïa ka Shillong Engineering College, watla ka jylla ka la ïoh ïa ka engineering college kaba nyngkong jong ka jylla.
“Nga sngew dukha mynsiem khyndiat,” ong u Mukul haba wanrah ïa kane ka mat hapoh ka ïingdorbar ha ka sngi Palei.
“Nga kyrpad ïa ka Sorkar ba kan sngewbha ban khot lang ïa ngi baroh khnang ba ngin ïoh ban ïaleh kmen lem,” u la ong.
Ha ka jubab jong u, u Myntri Rangbah ka Jylla u Conrad K Sangma u la phla ba wat ma u ruh u khlem shah khot sha kane ka jingïalang plie hynrei u la ai ka jingkular ba yn sa pynlong ïa ka prokram kaba kham biang ban kynmaw burom bad ha kaba yn sa khot lang ïa baroh ki nongïalam.
“Nga ruh ngam shym la shah khot. Hynrei, ki klas ki la sdang. Ngim pat shym la pynlong da ka prokram kaba dei ban pynlong. Ïa ka ïing building la dep ban plie hynrei ngim shym la ïoh ka jingmynjur na ka AITCE. Ngin sa pynlong da ka prokram kaba biang bad kaba itynnad. Ha ka jingshisha ka dei ka por kaba kmen bad sngew sarong na ka bynta ka jylla ba ka engineering college kaba nyngkong ka la sdang bad ngin sa pynthikna ba baroh kin shah khot sngewbha sha ka prokram,” la ong u Conrad.
Kaba kham lyngngoh, u Myntri ba khmih ïa ka tnat Pule Puthi ka jylla u Rakkam A Sangma ruh u la phla ba u khlem shah khot satia.
