Shillong, Nailur 11
Ka Laitkor SC ka la wanphai da ka jingjop ha ka lympung ïalehkai Shillong Premier League 2025, hadien ba ka la pynliem noh ïa ka Nangkiew Irat SC da 3-1 kol ha ka sngi Palei ha SSA Stadium kaba ha First Ground, Polo.
Da kane ka jingjop ka la long ka jingplie lad lang ïa kiwei pat ki klob ba kin bteng ban ïakhun na ka bynta ban ïaknieh ïa ka nam lahduh mynta ka aïom. Ha kajuh ka por kane ka long ka jingshah rem ba nyngkong ïa ka Nangkiew Irat ha kane ka aïom jong ka SPL.
Tad haduh ba kut jong kane ka jingïakhun, lada phai sha ka miej ïakheiñ poiñ, ïa ka kyrdan ba nyngkong dang ïai bat hi da ka Nangkiew Irat SC hadien ba ka la khur 10 poiñ, bud pat sa ka Mawlai (9 poiñ) ha ka kyrdan kaba ar, ka Shillong Lajong ha ka kyrdan balai hadien ba ka la khur 8 poiñ, katba na ka liang ka kynhun ïalehkai jong ka Laitkor SC ka la kiew mynta sha ka kyrdan kaba san ryngkat bad ka Langsning FC, hynrei ka jingïapher jong kine ki artylli ki kynhun ka long ha ka ‘goal difference’ (+9 to +1).
Haba phai sha kane ka jingïakhun, ka Nangkiew Irat tang hapoh ka 45 sekon ka la ïoh ban pynkhih jar nyngkong eh lyngba u Himanshu Patil.
Tangba ha kane ka kynti jong ka jingïakhun, ka Nangkiew Irat SC ka la kham shem jingeh hadien ba u Restom Khriam um shym la lah ban don lang bad ka kynhun hadien ka red-card na ka jingïakhun kaba la lah, ryngkat u Wallamsuk Nongkhlaw, bud pat sa arngut ki rangïalehkai kiba la hap ban shong peitkai hadien ba ki la dep ban ïoh pdiang mar artylli ki yellow card, katba sa uwei pat u rangïalehkai um lah ban don bad ka kynhun na ka daw ba u don la ka jong ka kam ba shimet jong u.
Kumta kane ka jingbym da don lut baroh ki rangïalehkai ba kynsai, ka plie lad ïa ka Laitkor kaba juh don ïa ka mynsiem ïakhun hapoh jong ka ban khur ïa kane ka jingjop.
Hadien kane, ka Laitkor SC kaba la ïeng ïakhun tyngeh ha kaba tang hadien shiteng kynta ka la lah ban pynphai lyngba u Batkyrshan Kharkongor (31′) bad ïa ka kol kaba ar da u Wadskhem Marbaniang (39′).
Haba wan ban bteng ïa ka kylla miet, u slap uba jur ula wan ban ther kumba pyllait na ka ktang, kaba shipor u rephri u la pynsangeh ïa kane ka jingïakhun ban twad jingmut na baroh artylli ki kynhun la kin sangeh noh ne bteng shakhmat ïa ka jingïakhun ki minit kiba sah, hynrei baroh ar kynhun ki shim beit ïa ka rai ban ïaid beit shakhmat, bad mar ïa sdang ka Laitkor ka la ïoh ïa ka kabu ba kan thep sa ïa ka kol kaba lai lyngba u Felixdarren Suting (76′).
Kumta ha kine ki lai miet jong ka jingïakhun ha kane ka lympung, la shem ka don bha ka jingkylla ha ka rukom ïalehkai, katno tam lei lei ba ki kynhun ba kham rit, mynta ki la sdang ban khie khlieh bad ban wanphai da ka jingjop kane ka lympung.
Ka jingïalehkai ha ka sngi Thohdieng kan long hadpeng ka Malki SC kaba don ha ka kyrdan kaba khyndai, pyrshah ïa ka kynhun kaba don shatrai duh ka miej ïakheiñ poiñ ka Nongrim Hills SC ha ka por 4:30 nohphai sngi.
