Ha ka rukom bat dustur ai bynta ne ai bhah ïa ki khun ha ngi ki Khasi ka don ka jingïapher na ka dustur u Khynriam, u Pnar, u Bhoi bad u War. Ha u Khynriam, u Mylliem,u Maram, ka rukom ai bhah ki kham ai bhah bun ïa ka khun khatduh. Hynrei ka don ka jingïapher ha ki khasi pnar, Khasi Bhoi bad Khasi war. Namar sha thain ri war ka khatduh kam don bor ne iktiar. ïa ka ïing ka sem ne ki jingdon jingem ka shong ha ki kmie ki kpa ban ai. Kumjuh ïa ka khyndew ka shyiap ruh kim ai tang ha ki kynthei. Nangta ïa ka khyndew ka shyiap don kiba ïa sam lang hapdeng shipara bad kynthei bad shynrang. Don kiba ai tang ïa ki kynthei. Kumta ka jingïapher ka don beit ha ngi ki para Khasi ruh ba shong ba sah ha ki thaiñ bapher bapher. Ki Bhoi ki don ïa ka jong ka rukom ai bhah ïa ki khun. Ki pnar ki don ïa ka jong ka rukom ai bhah ïa ki khun. Te ban shim kyllum ïa baroh ki dustur war, dustur Bhoi bad dustur Khynriam ki don beit ka jingïapher. Hooid kine baroh ki dei ka dustur u khun Khasi khara kynthup ka dustur Khynriam, Mylliem, Maram, u Pnar, u Bhoi, u War bad u Lyngngam. Ka dustur Khasi kam dei tang kajuh ka rukom kumba long ka ktien ruh ka don kum ka ktien Sohra, ka ktien Maram, ka ktien pnar bad kiwei kiwei. Hangne keiñ ngi dei ban sngewthuh ba don bun ki rukom bat dustur don bun ki ktien kren bapher bapher hapoh ka Bri U Hynñiewtrep.
C. B. Iawphniaw
