Shillong, Nailur 11
U General Secretary ka Khasi Student’s Union (KSU) samla Donald V Thabah u la ong ba watla ka jylla Meghalaya ka long kaba laitlan hynrei ka seng ka hap ban peit pyrman ïa ka jingrung jingmih ki briew nabar ka ri haba ka dang don ka jingïakhih kaba jur ha ri Nepal.
U la ong, ka jing-ïakhih ha Nepal bad ha Bangladesh ka ïapher namar ha Nepal ki paidbah ki ïakhih pyrshah ïa ka Sorkar hynrei ha Bangladesh ki ïabeh thong ïa kawei ka seng dei na kane ka daw ki wan riehtngen sha jylla Meghalaya.
“Watla bun ki Nepali ki don ha Meghalaya, hynrei ngim da ïohi than ba ka jingïakhih ha Nepal kan ktah ïa ka jylla namar ka jingïakhih ki paidbah pyrshah ïa ka Sorkar hynrei watla katta ngi dang peit pyrman,” u la ong.
U samla Donald u la ong ba haduh mynta ki BSF, pulit, ki sengbhalang ki ju ioh kem man ka por ïa ki nong Bangladesh kiba rung be-aiñ kaba buh jingma ïa ka jylla naduh ba ïakhih ha katei ka ri.
Ha kajuh ka por u kyrmen ba ka jingïakhih ha Nepal kan sa wanphai biang ka jingshongsuk shongsaiñ.
Kumban shu kdew kane ka jingïakhih ki paidbah ha jingïalam ki samla pule ha Nepal ka la jur bha namar ha ka 9 tarik mynta u bnai Nailur, 2025, u Myntri Rangbahduh ka ri Nepal bad katto katne ki Myntri ki la hiar shuki bad phet na la ka ri.
