Kathmandu, Nailur:
Katkum ki khubor, la iathuh ba ka Nepal haduh mynta ka dang sahkut hapoh ka jingkhangdam lane ka ‘Curfew’ ha baroh kawei ka ri hadien ba ka jingïakhih ‘Gen-z’ kaba la shim ia shibun ki mynsiem briew, ka la pynkhih-win ïa kitei ki jaitbynriew jong ka Himalaya ha kaba sdang jong kane ka taïew. Ha ka nongbah Kathmandu, ki shipai ki la bthah ia ki paidbah ba kin shong khop ha ïing hadien ba ki shipai ki la mih da ka bor shi miet ban pynsangeh ia ka jingkulmar kaba la wanrah ia ka jingiap briew kaba la pynlong ruh ia ka sorkar ban khyllem noh syndon katba ki nongiakhih ki la thang ia ki jingtei bad ki jingdon- jingem ha kylleng ki nongbah jong ka ri. Katkum ka khubor na ki bor pyniaid, ym duna ia ka 13 hajar ngut ki koidi ki la shah pyllait na ki phatok ha baroh 77 tylli ki distrik jong ka Nepal ha ki jingiakhih ba jur.
Ha ka Sngi Balang, ki nongmihkhmat jong ki nongïakhih ki la ïakynduh ïa ki heh shipai ha ka jaka treikam jong ki shipai ha Kathmandu, ban ïakren shaphang uwei u nongïalam, ha kaba katto- katne na ki, ki la pynbor ïa ka Sushila Karki, ka nongbishar barim ba pawnam.
U Mayor ka Kathmandu, u Balen Shah, uba la 35 snem ka rta, u nongrwai rap, uba la kylla long u enjiniar bad uba don ka jingsngewtynnat hapdeng ki samla, u la kyntu ia ki nongiakhih, ba kin long kiba iai-shah bad ap ia ka jingpynbeit ban thaw ia ka sorkar ba shipor.
